Shyǵys Qazaqtan oblysynda Indýstriialandyrý baǵdarlamasy boiynsha memlekettiń 750 mln teńge qarjysyna salynǵan eki nysan áli kúnge deiin iske qosylmaǵan, dep habarlaidy Altaynews.kz saity.
Olardyń biri Aiagózdegi qurylys materialdary kombinaty. Bul nysanǵa memleketten 400 mln teńge bólingen, sondai-aq barlyq qajetti kommýnikatsiialar tartylǵan. Onyń burynǵy iesi Qýat Ábjanovtyń sózinshe, ol salynyp bitpegen nysandy basqa adamǵa satyp jibergen.
«Aramza adamdar biznesti damytýǵa degen bizdiń túzý nietimizdi paidalanyp jatyr. Qýat Ábjanov barlyǵymyzdy aldap ketti. Buǵan qosa, barlyq basqarmalar osy jobaǵa qol qoiǵan, biraq qaýip-qaterlerdi tolyq taldamaǵan. Shyn máninde ol jerde eshkim jumys istegisi kelmegen. Problemalyq qurylysty sheship, barlyq qajetti sharalardy qabyldaý týraly tapsyrma beremin», - dedi ShQO ákimi Danial Ahmetov.
Dál osyndai jaǵdai kún batareialaryn óndirýi tiis bolǵan iri metallýrgiialyq zaýytqa qatysty týyndady. Jumsalǵan qarjynyń somasy 350 million dollardy quraidy. Alaida, iri kólemdegi memleket shyǵynyna qaramastan, kásiporyn áli kúnge deiin ónim óndirýge kirispegen.
«Osy másele boiynsha da mán-jaidy anyqtaý kerek. Bul nysan bir kún de jumys istegen joq. Oǵan qosa, usynylǵan tehnologiia eskirip jatyr. Bul, memleket qarjysy jelge ushty degen sóz», - dedi óńir basshysy.
Aita keteiik, Indýstriialandyrý baǵdarlamasy boiynsha oblysta 2019 jylǵa deiin 892 milliard teńgege 70 investitsiialyq joba iske qosylýy tiis. Bul 14 myń adamdy jumyspen qamtýǵa múmkindik beredi.
