Foto: Aqorda
Prezident Qasym-Jomart Toqaev Almaty qalasynyń ákimi Darhan Satybaldyny qabyldap, shahardyń áleýmettik-ekonomikalyq damýy, qala qurylysy men infraqurylymdyq jobalardyń júzege asyrylý barysy týraly esep tyńdady, dep habarlaidy Ult.kz.
Kezdesý barysynda qala ákimi ótken jyly Almatyda qysqa merzimdi ekonomikalyq indikator 12,8 paiyzǵa óskenin aitty. Onyń málimetinshe, memleket biýdjetine 6,6 trillion teńge kóleminde salyq pen mindetti tólemder túsken.
Darhan Satybaldy qalanyń birneshe ortalyǵyn damytýǵa baǵyttalǵan jańa strategiialyq bastamalardy tanystyrdy. Bul tujyrymdama aiasynda zamanaýi IT-infraqurylym, kópfýnktsionaldy iskerlik keshender men turǵyndardyń demalysyna arnalǵan abattandyrylǵan rekreatsiialyq aimaqtar qurylmaq. Atalǵan keńistikter almatylyqtar men qala qonaqtary jii baratyn qoǵamdyq oryndarǵa ainalýy tiis.
Sondai-aq ákim Almatyda zamanaýi kólik júiesin qalyptastyrý jónindegi josparlarmen bólisti. Júrdek qoǵamdyq kólik júielerin damytý turǵyndardyń qatynaýyn jeńildetip, qalanyń ornyqty damýyna serpin beredi.
Almatynyń Bas jospary aiasynda aýanyń erkin ainalymyn qamtamasyz etý, qalanyń joǵary jáne ortalyq bólikterindegi shamadan tys tyǵyz qurylysty shekteý, sondai-aq jasyl jelek aýmaǵyn úsh esege arttyryp, 3 800 gektarǵa deiin ulǵaitý kózdelgen.
Budan bólek, 2025 jyly qala kóshelerin sapaly jaryqtandyrý jumystary júrgizilip, jaryq qýaty eki esege artqany aityldy. Qalany abattandyrý, kógaldandyrý jáne qoǵamdyq keńistikterdi bezendirýdiń biryńǵai standartyna sai saiabaqtar men kóshelerdi jańǵyrtý da josparlanǵan.
Kezdesýde Almaty taý klasterin damytý jobasynyń jai-kúii de baiandaldy. Qazirgi tańda «Medeý» bazalyq stantsiiasy arqyly «Shymbulaq» pen «Oi-Qaraǵai» kýrorttaryn biriktirýge arnalǵan tehnikalyq-ekonomikalyq negizdeme ázirleý jumystary aiaqtalýǵa jaqyn. Joba júzege assa, aspaly joldardyń sany 16-dan 62-ge deiin kóbeiip, taý shańǵysy trassalarynyń uzyndyǵy 250 shaqyrymnan asady. Al demalys aimaqtary táýligine 40 myń adamǵa deiin qabyldai alatyn múmkindikke ie bolady.
Kezdesý qorytyndysynda Memleket basshysy Almaty ekonomikasyn odan ári ártaraptandyrý, ekologiialyq jaǵdaidy jaqsartý, ornyqty kólik jáne týristik infraqurylym qalyptastyrý, sondai-aq qala ortasynyń sapasy men turǵyndardyń turmys deńgeiin arttyrý jóninde birqatar naqty tapsyrma berdi.
