Prezident Qasym-Jomart Toqaev óńirdegi biregei sport jobasy – «Atletiko de Madrid Qazaqstan» halyqaralyq deńgeidegi fýtbol akademiiasynyń qyzmetimen tanysty, dep habarlaidy ult.kz.
Memleket basshysy akademiianyń 180 balaǵa arnalǵan jataqhanasyn aralap kórdi. Qazir munda elimizdiń ár túkpirinen kelgen 116 bala jattyǵady.
Akademiia oiynshylaryn ispandyq bapkerler iriktep, oǵan Qazaqstannyń barlyq óńirinen 4 myńnan asa bala qatysty. Ortalyqta jas fýtbolshylardyń tolyqqandy oqý úderisine, jattyǵýlary men jeke daiarlyǵyna barlyq jaǵdai jasalǵan.
Qasym-Jomart Toqaevqa akademiiany damytý jáne sporttyq infraqurylymdy keńeitý jospary kórsetildi. Osy oraida jasandy kógaly bar eki ashyq fýtbol alańyn, 500 oryndyq jabyq manej jáne ákimshilik-turmystyq keshenniń jańa ǵimaratyn salý kózdelgen.
Prezidentke akademiia ornyn tańdaýda balalardy shyńdai túsetin tabiǵat faktorlary eskerilgeni aityldy.
Almaty oblysynyń Talǵar aýdanyndaǵy taýdyń taza aýasy men jaǵymdy klimat bala aǵzasynyń tez qalpyna kelýine septigin tigizedi.
Budan keiin Qasym-Jomart Toqaev jabyndysy FIFA talaptaryna sai keletin fýtbol alańyn kórdi, sondai-aq dopty igerý tehnikasy men ispan ádistemesi boiynsha komandalyq is-qimyl daǵdylaryn pysyqtaýǵa kirisken jas fýtbolshylardyń jattyǵýyn tamashalady.
Is-sharaǵa Ispaniianyń Qazaqstandaǵy elshisi Lýis Fransisko Martines Montes, «Atletiko Madrid» fýtbol klýby direktorlar keńesiniń múshesi David Vilia, atalǵan klýbtyń akademiia isteri jáne halyqaralyq damý jónindegi direktorynyń orynbasary Mariia Teresa Kirivi qatysty.
