Foto: Aqorda
Prezident Qazaqstan delegatsiiasyna qonaqjailyq kórsetken Sanae Takaichige rizashylyǵyn bildirdi. Bul sapar, shyn máninde, eki el arasyndaǵy qarym-qatynastyń jańa kezeńi ekenin atap ótti, dep habarlaidy Ult.kz.
"Buǵan deiin Sizdiń elińizge tórt ret kelgen edim. Bul – meniń Prezident retindegi alǵashqy saparym. Qazaq-japon qarym-qatynasynyń berik institýtsionaldyq negizi qalyptasqan. Ózińiz aitqandai, 2004 jyly Japoniianyń sol kezdegi Syrtqy ister ministri Kavagýchi hanymmen birge «Ortalyq Aziia + Japoniia» formatyna bastamashy boldyq. Syrtqy ister ministrleri deńgeiindegi alǵashqy kezdesý Astanada ótti. Búginde mundai kezdesýlerdiń keńinen tanylǵany sonshalyq, iri memleketterdiń kóbi «Ortalyq Aziia pliýs» platformasyn quptaidy. Biraq Japoniia bul dialog alańynyń alǵashqy bastamashysy jáne negizin qalaýshy bolyp qala beredi", – dedi Qasym-Jomart Toqaev.
Japoniia Premer-ministri Qazaqstan Prezidentiniń resmi sapary eki eldiń ózara tiimdi yntymaqtastyǵyna tyń serpin beretinine senim bildirdi.
"Sizben júzdeskenime qýanyshtymyn. Osydan 21 jyl buryn Syrtqy ister ministrleriniń «Ortalyq Aziia + Japoniia» formatyndaǵy alǵashqy jiyny ótken edi. Oǵan Ózińiz tóraǵalyq ettińiz. Búgin, mine, «Ortalyq Aziia + Japoniia» formatyndaǵy memleket basshylarynyń kezdesýine Prezident laýazymynda qatysqaly otyrsyz. Qazaqstandy zań ústemdigine negizdelgen erkin ári ashyq álemdik tártipti nyǵaitý isinde strategiialyq seriktes retinde qarastyramyz. Ózara tiimdi qarym-qatynasty odan ári damytý úshin Sizben tyǵyz yntymaqtastyqty jalǵastyrýǵa niettimiz", – dedi Sanae Takaichi.
Kelissózder barysynda saýda-ekonomikalyq, investitsiialyq, kólik-logistikalyq, energetikalyq jáne mádeni-gýmanitarlyq salalardaǵy ekijaqty bailanystardy damytý perspektivasy egjei-tegjeili talqylandy.
