Qazaqstan Prezidenti – Joǵarǵy Bas Qolbasshy Qasym-Jomart Toqaev Qorǵanys ministrliginiń basshylyq quramymen kezdesý ótkizip, jańadan taǵaiyndalǵan ministr Murat Bektanovty tanystyrdy.
Memleket basshysy jańa ministrdiń bilimi men tájiribesi Qarýly Kúshterge júkteletin mindetterdi oryndaýǵa septigin tigizetinine senim bildirdi, dep habarlaidy "Ult aqparat" Aqordanyń resmi saityna silteme jasap.
Qasym-Jomart Toqaev ásker álemdegi jáne aimaqtaǵy kúrdeli jaǵdaida kez kelgen syrtqy qaýip-qaterge toitarys berýge, memleketimizdiń qaýipsizdigin qamtamasyz etýge daiyn bolýy kerek ekenin aitty.
Prezident Arys pen Jambyl oblysynyń Baizaq aýdanyndaǵydai tótenshe oqiǵalarǵa jol bermeýdiń asa mańyzdy ekenine toqtaldy. Bul rette Joǵarǵy Bas Qolbasshy oq-dáriler qoimalaryndaǵy qaýipsizdikti qamtamasyz etý jóninde bergen tapsyrmasyn áskerilerdiń esine salyp, bul baǵytta birqatar jumystar jasalǵanyn, degenmen áli de sheshimin kútken túiindi máselelerdiń bar ekenin atap ótti.
Memleket basshysy Qorǵanys ministrligine birqatar mindet júktedi.
Qasym-Jomart Toqaev QR Qarýly kúshterin damytýdyń 2030 jylǵa deiingi tujyrymdamasyn tolyqtai júzege asyrý qajet ekenine, áskeri qaýipsizdiktiń syn-qaterlerine shuǵyl áreket etý úshin basqarý organdarynyń daiyndyq is-sharalaryn jalǵastyra berýge nazar aýdardy.
Prezident Qarýly kúshterdi jabdyqtaý boiynsha mindettemelerdi oryndaý barysynda otandyq qorǵanys ónerkásibi keshenimen kelisip jumys isteýdi tapsyrdy. Sonymen qatar ofitserler men kelisim-shart boiynsha alynatyn qyzmetkerlerge sapaly daiyndyq júrgizýdi qamtamasyz etýge, ofitserler men generaldar qatarynda sybailas jemqorlyqqa jol bermeýge shaqyrdy.
Joǵarǵy Bas Qolbasshy oq-dári saqtaityn barlyq qoimalarda jáne basqa da qarý-jaraq saqtaityn jerlerde qaýipsizdikti qamtamasyz etý jóninde túbegeili sheshim qabyldaýdy, sondai-aq eldi mekenderden alys jerde oq-dári saqtaityn zamanýi qoimalar salý jumystaryn jyldamdatýdy tapsyrdy. Buǵan qajetti qarajat «Qaýipsiz el» Ulttyq jobasynan qarastyrylýy tiis.
Memleket basshysy jiyn sońynda jańa ministrge jáne barlyq áskerilerge asa jaýapty qyzmette tabys tiledi. Taǵaiyndalǵan ministr Murat Bektanov Úkimet múshesi retinde ant qabyldady.
Jiyn barysynda otstavkaǵa ketken burynǵy ministr Nurlan Ermekbaev sóz sóilep, Prezidentten, Jambyl oblysynyń Baizaq aýdanynda bolǵan qaiǵyly oqiǵadan qaza tapqandardyń aǵaiyn-týysynan jáne zardap shekkenderden keshirim surady.
