Foto: Aqorda
Memleket basshysy Tokio gýbernatory Iýriko Koikemen kezdesý ótkizdi, dep habarlaidy Ult.kz.
Qasym-Jomart Toqaev pen Iýriko Koike tsifrlandyrý, Smart city tehnologiialaryn jáne qalany ornyqty damytý, jasandy intellekt, shahardy basqarý isine innovatsiialyq sheshimderdi engizý salalaryndaǵy yntymaqtastyq máselelerin talqylady.
Sonymen qatar megapolisterdiń turǵyndary men qonaqtary úshin anaǵurlym jaily, ekologiialyq turǵydan taza, qaýipsiz jáne inkliýzivti orta qalyptastyrý jaiyn qarastyrdy.
Memleket basshysy qalany basqarý isine jasandy intellektini engizý boiynsha eki el astanalary arasyndaǵy yntymaqtastyqtyń áleýeti zor ekenine toqtaldy.
Kezdesýde Qasym-Jomart Toqaevqa Tokio qalasynyń Smart city tujyrymdamasy tanystyryldy. Joba halyqtyń turmys sapasyn jaqsartýdy, shahardy basqarý tiimdiligin arttyrýdy jáne ornyqty damý úshin ozyq tehnologiialardy paidalanýdy kózdeidi.
Osydan keiin Prezident Tokio gýbernatorymen birge Tótenshe jaǵdailar jónindegi ahýaldyq ortalyǵyn aralap kórdi. Bul azamattyq qorǵanys pen qaladaǵy qaýip-qaterlerdiń aldyn alýdyń negizgi júiesi sanalady.
Ortalyqtyń basty mindeti – qaladaǵy ahýalǵa udaiy monitoring júrgizý, tótenshe jaǵdai kezinde bilik organdarynyń is-áreketin úilestirý, yqtimal qater men oryn alǵan apattar (jer silkinisi, taifýn, sý tasqyny, iri tehnogendik apattar, lańkestik aktiler) týraly aqparattardy taldaý.
BAQ pen áleýmettik jelilerdegi jalǵan aqparattyń taralýyna qarsy is-qimylǵa basa kóńil bólinedi. Bul jumyspen táýlik boiy monitoring júrgizetin arnaiy bólimshe shuǵyldanady.
Al kúndelikti ómirde keshen daǵdarys jaǵdailaryn basqarý júielerin josparlaý jáne jetildirý, azamattyq qorǵanystyń óńirlik josparyn ázirleý, oqý-jattyǵý jiyndaryn daiyndaý jáne ótkizý, halyqty qulaqtandyrýǵa, apattardyń saldaryn joiýǵa arnalǵan aqparattyq júielerdi damytý isimen ainalysady.
