QR Prezidenti Qasym-Jomart Toqaev Almaty turǵyny, Ekinshi dúniejúzilik soǵys ardageri Qaiyrly Jońqabaevtyń jazǵan hatyna jaýap berdi, dep habarlaidy "Ult aqparat".
Maidanger hatta Ishki ister ministri Erlan Turǵymbaevtyń sheshimimen Qazaqstan Respýblikasynyń Ulttyq ulany uiymdastyryp jatqan «Biz – Jeńistiń muragerimiz!» atty taǵzym estafetasy úshin alǵys aitqan bolatyn. Kaliningrad maidanynda, Máskeý túbindegi jáne Rjev shaiqasyna qatysyp, alapat soǵystyń bar taýqymetin kórgen 99 jastaǵy ardagerge Prezidenttiń sálemdemesin Ulttyq ulan «Ońtústik» óńirlik qolbasshysynyń orynbasary polkovnik Niiaztai Álkeshev tabys etti.
«Qurmetti Qaiyrly Ýataiuly! Izgi tilekpen jáne ystyq yqylaspen jazǵan hatyńyzdy aldym. Jyly lebizińiz úshin shyn kóńilmen alǵysymdy bildiremin. Biyl elimizde Uly Jeńistiń 75 jyldyǵy keń kólemde atalyp ótedi. Bul – eń aldymen, ózińiz siiaqty ardagerlerimizge kórsetken qurmetimiz. Sizderdiń zulmat jyldardaǵy erlikterińiz eshqashan umytylmaidy. Soǵystan keiingi adal eńbekterińiz de óskeleń urpaq úshin árdaiym úlgi-ónege. Sizder Qazaqstannyń táýelsiz memleket retinde qalyptasýyna zor úles qostyńyzdar. Sondyqtan ózderińizdi ardaqtap, erlikterińizdi dáripteý – azamattyq ári perzenttik boryshymyz.Sizge zor densaýlyq, áýletińizge amandyq tileimin!
Júzge jetip, ǵasyr toiyn toilańyz! Urpaǵyńyzben myń jasańyz!», - dep jazylǵan Prezident joldaǵan hatta.
Memleket basshysynyń ózinen hat alǵan qariianyń kóńili shalqyp, riza bolyp qaldy.
«Qurmetterińe raqmet, ainalaiyndar! Elbasymyz aman bolsyn, Maǵan ýaqytyn bólip lebizin bildirgen Prezidentimizge óte rizamyn, aman bolsyn! Elimiz úshin atqaryp jatqan qyzmeti baiandy bolyp, úlken jetistikterge jeteiik. Elimizde tynyshtyq bolsyn. Respýblikamyz dami bersin, ekonomikamyz óssin, damyǵan memlekettermen terezemiz teń bolsyn. Keleshek jastardyń qolynda. Olar sony bilý kerek, eń aldymen bilim alý kerek», - dedi ardager.
