Memleket basshysy Qasym-Jomart Toqaev Soltústik Qazaqstan oblysynyń ákimi Qumar Aqsaqalovty qabyldady, - dep habarlaidy "Ult aqparat" Aqordaǵa silteme jasap.
Qasym-Jomart Toqaevqa oblys ákimi aimaqtyń damýy jóninde, atap aitqanda, aýyl sharýashylyǵynyń damýy, jylytý maýsymyna daiyndyq jáne investitsiialyq jobalardy júzege asyrý jóninde baiandady.
Qumar Aqsaqalovtyń aitýynsha, óńirde kúzgi egin naýqany bastaldy. Biyl bidaidyń bir gektarynan 16 tsentner alý boljanyp otyr. Oblysta 170 myń tonna mineraldy tyńaitqysh engizilmek. Óńir basshysy bul kórsetkish boiynsha respýblikada SQO kósh basynda turǵanyn jetkizdi.
Agrarlyq sektorǵa biyl 180 milliard teńge investitsiia tartylady. Soltústik Qazaqstan oblysynda quny 76 milliard teńge bolatyn 31 joba júzege asyrylyp jatqany aityldy. Sonymen qatar aýyl sharýashylyǵyna 2,4 myń tehnika alynǵan. Qazir aimaqta 17 sút fermasy, 3 qus fabrikasy, jylyjai kesheni jáne mai ekstraktsiialaý zaýyty salynyp jatyr. Óńirde sút óndirisi 26 paiyzǵa ósken.
Prezidentke ónerkásip salasyndaǵy jobalar týraly da aityldy. Biyl kirpish zaýyty men temir beton buiymdary, irimshik shyǵaratyn sút zaýyty ashyldy. Qaǵaz ónimderin shyǵaratyn fabrika men avtoklavty gazobloktar kásiporny iske qosylmaq. AJT, elektr qalqanynyń jabdyqtary jáne jeńil temir qurylysy syndy jobalardy iske asyrý bastalady.
Jańa oqý jylynda M.Qozybaev atyndaǵy Soltústik Qazaqstan ýniversitetinde zamanaýi zerthanalarmen jabdyqtalǵan oqý-zerthanalyq korpýs ashylady. Álemdegi úzdik 100 joǵarǵy oqý oryndarynyń biri – Arizona ýniversitetimen birigip, qos diplomdy bilim alýǵa stýdentterdi qabyldaý alǵash ret júrgizildi.
Oblysta biyl 401 myń sharshy metr turǵyn úi paidalanýǵa beriledi. Aimaqtaǵy joldardy jóndeýge biyl 22 milliard teńge bólingen. Bul qarjyǵa 663 shaqyrym jol jóndeledi. Sonymen qatar 55 aýylda sý qubyryn tartý jumystary júrgizilip jatqany týraly málimet berildi.
Kezdesý sońynda Qasym-Jomart Toqaev egin jinaý naýqanyn josparǵa sai oryndaýdy jáne oblystaǵy ózge de jobalardy odan ári jalǵastyrýdy tapsyrdy.
