Qazaqstan Prezidenti Qasym-Jomart Toqaev Shyǵys Qazaqstan oblysynyń jurtshylyǵymen kezdesti, "Ult aqparat" Aqordaǵa silteme jasap.
Memleket basshysy jurtshylyqpen kezdesý aldynda D.Serikbaev atyndaǵy Shyǵys-Qazaqstan memlekettik tehnikalyq ýniversitetinde ashylǵan arheologiialyq kórmeni aralap kórdi.
Kórme Shilikti alqabyndaǵy jáne Tarbaǵatai bókterindegi ejelgi jáne orta ǵasyrlyq eskertkishterge arnalǵan.
Qasym-Jomart Toqaev jurtshylyqqa arnalǵan sózinde oblystyń negizgi áleýmettik-ekonomikalyq kórsetkishterine toqtaldy.
– Ótken jyldyń qorytyndysy boiynsha ónerkásip óndirisiniń kólemi 9,3 paiyzǵa artqan. 2015-2018 jyldardaǵy indýstriialandyrý baǵdarlamasynyń aiasynda 19 joba júzege asyrylyp, 3,5 myń jańa jumys orny ashylǵan. Oblys ekonomikada jaqsy kórsetkishterge qol jetkizip qana qoimai, áleýmettik salany tabysty damytý jaǵynan da úlgi kórsetip otyr, – dedi Memleket basshysy.
Sonymen qatar, Qazaqstan Prezidenti azamattardy alańdatyp otyrǵan mańyzdy máselelerge nazar aýdardy.
– Men úshin ákimderdiń jumysynyń basty kórsetkishi - jańadan ashylǵan jumys oryndarynyń sany, eńbekaqy kólemi jáne eńbek etýge jasalǵan jaǵdai. Osyǵan bailanysty, oblys basshylyǵyna atalǵan baǵyttaǵy jumystardyń tiimdiligin túbegeili arttyrýdy tapsyramyn, – dedi Prezident.
Memleket basshysy biznestiń damýyna qolaily jaǵdai jasaý ákimdik jumysynyń negizgi baǵyty bolý kerek dep esepteidi.
– Birneshe iri óndiristik kásiporynnyń bolýy ShQO-nyń artyqshylyǵy. Shaǵyn jáne orta biznespen bailanysyn arttyrý úshin olardyń múmkindikterin belsendi paidalaný kerek, – dedi Qasym-Jomart Toqaev.
Qazaqstan Prezidenti azamattardyń ómir súrý sapasyn arttyrýdy basym baǵyttardyń biri retinde atady.
– Búginde oblystaǵy 710 eldi mekenniń jartysynan sál ǵana asatyn bóligi ortalyqtandyrylǵan aýyz sýmen qamtylǵan. Óńirlerdi damytý baǵdarlamasyna sáikes 2020 jylǵa qarai aýyldardyń 80 paiyzyna taza aýyz sý jetkizilýi kerek, – dedi Memleket basshysy.
Qasym-Jomart Toqaev sheshilýi qajet kelesi mindet retinde týristik infraqurylymdy damytý dep belgiledi.
– Qazirgi jaǵdaida týrizm indýstriiasy ekonomikalyq ósimniń mańyzdy draiveri ári jańa jumys oryndaryn ashýǵa múmkindik beredi. Týrizmdi damytý Memlekettik baǵdarlamasy aiasynda jylyna 2 millionnan astam týrist tarta alatyn Alakól jaǵalaýy, 10 negizgi týristik ortalyqtyń qataryna endi. Byltyr kóptegen qazaqstandyqtar Alakólde demalýdy jón kórgen, alaida, olarǵa sapasyz qyzmet kórsetilgen. Halyq jergilikti avtomobil joldarynyń tozyp ketkenine shaǵymdandy. Osyǵan bailanysty, Shyǵys Qazaqstan men Almaty oblystarynyń ákimderine jergilikti joldardy jóndeý, qyzmet kórsetý sapasynyń deńgeiin kóterý máselelerin tez arada sheshýdi tapsyramyn, – dedi Qazaqstan Prezidenti.
Memleket basshysy óńirdegi ekologiialyq jaǵdaidy jaqsartýǵa jan-jaqty toqtaldy.
– Semei poligonynyń bizge qandai zardap ákelgenin eshqashan umytpaimyz. Iadrolyq qarýdyń synaqtary bizdiń jerimiz ben tabiǵatymyzǵa orny tolmas apat ákeldi. Bizdiń elimiz Semei poligonyn jaýyp, álemdegi iadrolyq qarýǵa qarsy qozǵalysta kóshbasshy boldy. Alaida, sol synaqtardyń aýyr zardaptary áli kúnge bizdiń azamattarymyzdyń densaýlyǵyna ziianyn tigizýde. Meni ásirese, qan ainalymy júiesi men qaterli isik aýrýlarynyń kóbeiip ketkeni qatty alańdatady. Bul aýrýlar boiynsha oblystaǵy kórsetkish respýblikalyq ortasha esepten 1,5 esege kóp. Odan bólek, adamdardyń densaýlyǵy men kóńil-kúiine keri áser etetin ziiandy zattardyń aýaǵa shamadan tys taraýy da aimaqtaǵy ózekti másele, – dedi Qasym-Jomart Toqaev.
Osyǵan bailanysty, Prezident Úkimet pen Shyǵys Qazaqstan oblysynyń ákimdigine úkimettik emes uiymdarmen jáne kásiporyndarmen birlesip, qorshaǵan ortanyń sapasyn jaqsartý úshin keshendi sharalardy júzege asyrýdy tapsyrdy.
Memleket basshysy jemqorlyqtyń áli de bolsa qoǵamnyń asqynǵan dert ekenin, onyń el úshin atqarylýy tiis kóptegen bastamalar men jobalarǵa kedergi keltirip otyrǵanyna ókinish bildirdi.
– Men óz tarapymnan bul júieli máseleni sheshý úshin bar kúsh-jigerimdi salamyn. Alaida, azamattardyń ózderi belsendilik tanytpai, jemqorlyqty joiý múmkin emes. Prezident retinde aitarym, men úshin ádilettilik – barshanyń zań aldyndaǵy teńdigi, – dedi Qasym-Jomart Toqaev.
Kezdesý barysynda azamattyq qoǵam ókilderi, jastar, pedagogtar, dárigerler men kásipkerler óz pikirlerin bildirdi.
