Qasym-Jomart Toqaev Danial Ahmetovtiń aimaqtyń áleýmettik-ekonomikalyq jaǵdaiy týraly esebin tyńdady, dep habarlaidy "Ult aqparat" Aqordanyń baspasóz qyzmetine silteme jasap.
Oblys ákiminiń aitýynsha, fizikalyq ósim indeksi 5 paiyzǵa jetse, negizgi kapitalǵa salynǵan investitsiia 5 paiyzdan asqan. Aýyl sharýashylyǵy men qurylys salalarynda da edáýir ósim baiqalady.
Kezdesýde ekonomikany odan ári damytý perspektivalary talqylandy. Atap aitqanda, óndiris qarqynyn eki ese arttyrýǵa múmkindik beretin «Aqtoǵai» metallýrgiia kesheniniń ekinshi kezegin aiaqtaý máselesi sóz boldy.
Sonymen qatar Prezidentke óńirdegi bilim berý nysandaryn dástúrli formatqa kóshirýge daiyndyq jumystary týraly aqparat berildi. Bilim berý salasynyń qyzmetkerleri túgeldei derlik vaktsina saldyrǵan.
Jalpy, oblysta kúnine 10 myń adamǵa vaktsina salynady. Negizgi kontingentke qyrkúiek aiynyń sońyna deiin vaktsinanyń birinshi komponenti, al qazan aiynyń sońyna deiin ekinshi komponenti salynady. Jalpy 747 myń adamǵa ekpe salý josparlanǵan.
Danial Ahmetov Memleket basshysyn buqaralyq sportty damytý jóninde bergen tapsyrmalarynyń oryndalý barysy týraly da habardar etti. Mekteptegi sportty damytýǵa qosymsha 890 million teńge bólingen. Búginde mektep oqýshylarynyń 50 paiyzdan astamynyń sportpen shuǵyldanýǵa múmkindigi bar. Biyl taǵy 15 iri sport nysanynyń qurylysyn aiaqtaý josparlanǵan.
Qasym-Jomart Toqaev memlekettik áleýmettik mindettemelerdi oryndaý mańyzdy ekenin atap ótip, óńirdegi kópbalaly jáne az qamtylǵan otbasylarǵa úzdiksiz kómek kórsetýdi tapsyrdy.
