Prezident Qaraǵaily yqshamaýdanyndaǵy qurylys jumystarymen tanysty, dep habarlaidy Aqorda.
Semeige jasaǵan jumys sapary barysynda Qasym-Jomart Toqaev jalpy kólemi 203 gektardy bolatyn Qaraǵaily yqshamaýdanynda salynyp jatqan qurylys jumystarynyń qarqynymen tanysty.
Yqshamaýdandaǵy turǵyn-úi qory 787,7 myń sharshy metr. Fizika-matematika pánderin tereńdetip oqityn 720 oqýshyǵa arnalǵan Nazarbaev ziiatkerlik mektebiniń qurylysy aiaqtalǵan. Janynda 120 oryndyq jataqhanasy bar.
Sonymen qatar memlekettik-jekemenshik áriptestik aiasynda 320 oryndyq balabaqsha salynǵan. Jýyrda Qaraǵaily yqsham aýdanynda 1405 páterlik 20 turǵyn úi paidalanýǵa berilgen.
Sondai-aq Qaraǵailyda 3 mektep, 6 bala baqsha, muz modýli jáne ońaltý ortalyǵy salynady.
Memleket basshysynyń turǵyn úi qurylysyn damytýǵa qatysty tapsyrmasy óz nátijesin berýde. Sońǵy eki jylda 200-den astam muqtaj otbasyǵa Qaraǵaily yqsham aýdanynan páter berilgen.
Kópbalaly analarmen kezdesken Prezident memleket áleýmettik qoldaýdy jalǵastyra beretinin aitty.
– Úkimet kóp balaly analarǵa, muqtaj otbasylarǵa udaiy kómek berip keledi. Ártúrli jeńildikter qarastyryp otyr. Eń bastysy ózderińizdei kóp balaly analardyń eńbekke erekshe degen talpynysy qýantady. Bala tárbiesimen ainalysyp qana qoimai, halyqty jumyspen qamtyp otyrǵan igi isterińiz ózgelerge úlgi bolýy kerek. Sondyqtan sizderdi árdaiym qoldai beremiz, – dedi Qasym-Jomart Toqaev.
Kópbalaly analar «Eńbek» memlekettik baǵdarlamasy sheńberinde kórsetilip jatqan qoldaýǵa, kámelettik jasqa tolmaǵan 4 jáne odan da kóp balasy bar otbasylarǵa beriletin áleýmettik járdemaqy somasynyń ulǵaiýyna, Semeidi damytýdyń keshendi josparynyń qabyldanýyna qatysty alǵystaryn aitty.
Sonymen qatar otbasylyq biznesti damytýǵa beriletin granttardyń tizimin keńeitý, grant somasyn ulǵaitý jónindegi usynystaryn jetkizdi.
Prezident Qaraǵaily yqsham aýdanyndaǵy biregei sport keshenin aralap kórip, mundai nysan Qazaqstannyń ár qalasynda salynýy qajet ekenin atap ótti.
