Prezident Qasym-Jomart Toqaev Saýd Arabiiasy Koroldiginiń investitsiia ministri Halid Ál-Falihti qabyldady, - dep habarlaidy "Ult aqparat" Aqordanyń baspasóz qyzmetine silteme jasap.
Kezdesý barysynda saýda-ekonomikalyq bailanystardy odan ári damytý jáne investitsiia tartý máseleleri talqylandy.
Qasym-Jomart Toqaev Halid Ál-Falihtiń sapary Saýd Arabiiasy Koroldiginiń taq murageri Muhammed ben Salman Ál Saýdimen telefon arqyly bolǵan mazmundy áńgimelesýdiń jalǵasy ekenin atap ótti.
Memleket basshysy Qazaqstanǵa 30 jyldan beri kórsetip kele jatqan qoldaýy úshin Saýd Arabiiasyna rizashylyǵyn bildirdi.
"Elderimiz arasyndaǵy yntymaqtastyqty ilgeriletý jáne onyń mánin tereńdete túsý úshin kóptegen múmkindik bar ekenine senimdimiz. Osy oraida, Taq muragerimen telefon arqyly áńgimelesý kezinde bolashaqta qolǵa alynatyn birqatar jobany talqyladyq. Ózara is-qimyldarymyz tereńdei túsedi. Elimizge jasaǵan saparyńyzǵa rizashylyǵymyzdy bildiremiz. Sizdiń qoldaýyńyzben jáne meniń Ákimshiligimniń jumys júrgizýimen ekijaqty bailanystarymyzdy shynaiy ilgeriletemiz dep oilaimyn", - dedi Qazaqstan Prezidenti.
Óz kezeginde Halid Ál-Falih Qasym-Jomart Toqaevqa qabyldaǵany úshin alǵys bildirip, Saýd Arabiiasynyń Koroli Salman ben Ábdel Áziz Ál Saýdtyń jáne Koroldiktiń Taq murageriniń sálemderin jetkizdi.
"Olar Qazaqstanǵa odan ári órkendeý men igilik jolynda qoldaý kórsetýdi jalǵastyra beretinderin naqtylady. Qazaqstannyń júrgizip otyrǵan reformalary men Ortalyq Aziiadaǵy kóshbasshylyǵyn, sonymen qatar 30 jyl buryn tańdaǵan biregei jolyn joǵary baǵalaidy. Osy ýaqyt aralyǵynda Qazaqstannyń Tuńǵysh Prezidenti negizin qalaǵan syndarly saiasat ózińizdiń parasatty basshylyǵyńyzben jalǵasyp keledi", - dep atap ótti Saýd Arabiiasynyń ministri.
