Búgin L.N. Gýmilev atyndaǵy Eýraziia ulttyq ýniversiteti QR UǴA akademigi, zań ǵylymdarynyń doktory, professor Salyq Zimanovtyń 100 jyldyǵyna arnalǵan «Salyq Zimanov: azamat, ǵalym, memleket jáne qoǵam qairatkeri» atty respýblikalyq ǵylymi-tájiribelik konferentsiia ótip jatyr, dep habarlaidy QazAqparat.
Is-shara el Táýelsizdiginiń 30 jyldyǵy aiasynda uiymdastyrylyp otyr. Konferentsiia Memleket basshysy Qasym-Jomart Toqaevtyń quttyqtaýymen ashyldy. QR Premer-ministriniń orynbasary Eraly Toǵjanov Memleket basshysynyń quttyqtaý sózin oqydy.
«Qurmetti konferentsiiaǵa qatysshylar! Búgin asa kórnekti ǵalym, akademik Salyq Zimanovtyń týǵanyna 100 jyl toldy. Búgin zań ǵylymy ǵana emes, búkil elimiz úshin aitýly kún. Salyq Zimanuly táýelsiz Qazaqstannyń quqyqtyq negizderin qalyptastyrýǵa orasan zor eńbek sińirdi. Ol memlekettik, Egemendik týraly deklaratsiiany, Qazaqstan Respýblikasynyń memlekettik táýelsizdigi týraly Konstitýtsiialyq zańdy – alǵashqy Ata Zańymyzdy ázirleýge at salysty. Sondai-aq, Qazaqstandaǵy parlamentarizm institýtyn damytýǵa barynsha úles qosty. Áigili ǵalym quqyq salasynyń qyr-syryna tereń boilap, taǵylymdy eńbekter jazyp qaldyrdy. Ásirese elimizdiń saiasi jáne quqyqtyq damý tarihy, biler institýty siiaqty úlken taqyryptardy tereń zerttedi. Onyń mol murasy aldaǵy ýaqytta da el igiligine ainala beretini anyq», - delingen Memleket basshysynyń quttyqtaý sózinde.
Prezidenttiń aitýynsha, Salyq Zimanuly ulaǵatty ustaz retinde kóptegen bilikti zańgerler tárbielep ósirdi.
«Onyń shákirtteri el ekonomikasynyń túrli salasynda tabysty eńbek etip júr. Onyń mereitoiy Táýelsizdigimizdiń 30 jyldyǵymen tuspa-tus kelip otyr. munyń simvoldyq máni zor. Týǵan eline qaltqysyz qyzmet etken Salyq Zimanovtyń ǵibratty ǵumyry jas urpaqqa árdaiym úlgi-ónege. Konferentsiia jumysy tabysty bolsyn, egemendi elimiz órkendei bersin!», - deidi Memleket basshysy.
Is-shara aiasynda L.N. Gýmilev atyndaǵy EUÝ-dyń zań fakýltetinde akademik Salyq Zimanov atyndaǵy aýditoriianyń ashylýy ótip, ǵylymi eńbekteri men ómirbaianynyń fotomaterialdar kórmesi uiymdastyrylady.
