Foto: Aqorda
Prezidentter áńgimelesý barysynda Qazaqstan jáne Palestina arasyndaǵy dostyq, ózara qurmet pen qoldaýǵa negizdelgen qarym-qatynasty odan ári damytý mańyzdy ekenin atap ótti, dep habarlaidy Ult.kz.
Memleketter basshylary saiasi dialogty nyǵaitý, saýda-ekonomikalyq jáne mádeni-gýmanitarlyq yntymaqtastyqty, sondai-aq kópjaqty qurylymdar aiasyndaǵy yqpaldastyqty keńeitý perspektivasyn talqylady.
Taraptar halyqaralyq kún tártibindegi ózekti máseleler, sonyń ishinde Taiaý Shyǵystaǵy ahýaldy retteý jóninde pikir almasty.
Qazaqstan Prezidenti «Qos halyq úshin eki memleket» formýlasyna súiene otyryp, aimaqta tezirek beibitshilik pen turaqtylyq ornatýǵa baǵyttalǵan jahandyq áreketterdi qýattaitynyn jetkizdi.
Palestina basshysy Mahmud Abbas eli men halqyna udaiy qoldaý kórsetkeni úshin Qasym-Jomart Toqaevqa alǵys aityp, Qazaqstannyń álemdegi turaqtylyq pen qaýipsizdikti nyǵaitý isinde airyqsha ról atqaratynyna nazar aýdardy.
Qasym-Jomart Toqaev Mahmud Abbasty ózine qolaily ýaqytta Astanaǵa saparmen kelýge shaqyrdy.
