Qasym-Jomart Toqaev halyqaralyq «Qazaq tili» qoǵamynyń negizin salýshylardyń biri, kórnekti ǵalym, Ulttyq Ǵylym akademiiasynyń akademigi Ómirzaq Aitbaevtyń dúnie salýyna bailanysty onyń otbasyna kóńil aitý jedelhatyn joldady.
Bul týraly Aqordanyń baspasóz qyzmeti habarlady.
«Ómirzaq Aitbaiuly Táýelsizdiktiń alǵashqy kúnderinen bastap memlekettik tildiń mártebesiniń artýyna ólsheýsiz úles qosty. Ol qazaq terminologiiasynyń damýyna, til bilimi mamandarynyń jańa býynyn qalyptastyrýǵa zor eńbek sińirgen ulaǵatty ustaz jáne iri ǵalym edi. Qazaq ziialylarynyń arasynda ózindik orny bar qadirli Ómirzaq Aitbaiulynyń ǵylymi murasy el bolashaǵy men ult igiligine qyzmet ete beredi dep senemin», – delingen jedelhatta.
