Memleket basshysy Qytai Kompartiiasynyń Chjetszian provintsiiasyndaǵy hatshysy Che Tsziýnmen kezdesti, dep habarlaidy "Ult aqparat" Aqordaǵa silteme jasap.
Qasym-Jomart Toqaev qonaqjailyq kórsetkeni úshin Chjetszian provintsiiasynyń basshysyna rizashylyq bildirip, Qytai Halyq Respýblikasynyń qarqyndy damyp kele jatqanyn aitty.
Qazaqstan Prezidenti eki el arasyndaǵy qatynastar strategiialyq seriktestiktiń jańa deńgeiine kóterilgenin atap ótip, osy memlekettik sapar barysynda qol jetkizilgen ýaǵdalastyqtar ózara áriptestikke tyń serpin beretinin aitty.
– Máńgilik strategiialyq seriktestigimiz, shyn máninde, ózara yntymaqtastyqtyń kóptegen salalaryn qamtidy. Tuńǵysh Prezidentimiz Nursultan Nazarbaev pen Qytai basshylary negizin qalaǵan isti jalǵastyramyz. Biz ekonomika, saiasat jáne óńirlik qaýipsizdik, sondai-aq mádeni-gýmanitarlyq salalarda yntymaqtastyq ornatamyz, – dedi Qasym-Jomart Toqaev.
Memleket basshysy Qytaidyń tsifrlyq ekonomikany damytý salasynda orasan zor jetistikke jetkenine toqtalyp, osy saladaǵy máselelerdi talqylaý úshin Chjetszian provintsiiasyna arnaiy at basyn burǵanyn aitty.
– Hanchjoý – Qytai mádenietiniń besigi. Bul qala álemdegi joǵary tehnologiialar ortalyǵy bolyp tabylady. Munda osy sala boiynsha iri kompaniialar jumys isteidi. Sonymen qatar bul qalada kezinde Qytai Tóraǵasy Si Tszinpin jumys istep, óziniń eń tabysty ideialaryn júzege asyrǵan. Qala kórikti jáne tabysty ári qarqyndy damýda, – dedi Memleket basshysy.
Che Tsziýn Qasym-Jomart Toqaevqa ekonomikanyń túrli salalary boiynsha Qazaqstanmen tyǵyz yntymaqtastyq jáne mádeni yqpaldastyq ornatýǵa daiyn ekenin aitty.
