Qazaqstan Prezidenti Qytai Kompartiiasy OK Saiasi biýrosynyń múshesi Ian Tszechimen kezdesti, dep habarlaidy Aqordanyń baspasóz qyzmeti.
Ian Tszechi Qasym-Jomart Toqaevqa QHR basshylyǵynyń koronavirýs indetiniń taralýyna qarsy kúres jóninde qabyldaǵan sharalary týraly baiandady.
Memleket basshysy Qytaidyń indetti aýyzdyqtaý úshin atqaryp jatqan jumystaryn joǵary baǵalap, Qazaqstannyń osy jahandyq deńgeidegi qaýipke qarsy birlesip kúresýge nietti ekenin aitty.
– Osyndai qiyn sátte Qazaqstan Respýblikasy Qytai Halyq Respýblikasy basshylyǵynyń naqty ári tabandy is-áreketterine jan-jaqty qoldaý bildiredi. Tóraǵa Si Tszinpinniń ózi aitqandai, bul qytai halqynyń sońǵy jyldary bastan keship otyrǵan eń qiyn kezeńi. Ómirdiń ártúrli kezeńderinde kezdesetin osyndai aýyrtpalyqtarmen birlesip kúresemiz dep oilaimyn. Eki memleket arasyndaǵy strategiialyq seriktestikti damytý jáne nyǵaitý jolynda alǵa qadam basa beremiz, – dedi Memleket basshysy.
Kezdesý barysynda qazaq-qytai bailanystaryn nyǵaitýdyń perspektivalary, sondai-aq, eki eldiń halyqaralyq arenadaǵy yqpaldastyǵy talqylandy.
– QHR Tóraǵasy Si Tszinpinniń sálemin jetkizýge ruqsat etińiz. Siz byltyr qyrkúiek aiynda Qytaiǵa alǵash ret memlekettik saparmen bardyńyz. Sol kezde QHR Tóraǵasymen birlesip jan-jaqty strategiialyq seriktestikti odan ári damytý týraly málimdeme jasap, qytai-qazaq qatynastaryna tyń serpin berdińizder, – dedi Ian Tszechi.
