Qasym-Jomart Toqaevqa «QazTransGaz» kompaniialar tobynyń biylǵy segiz aidaǵy óndiristik jáne qarjylyq kórsetkishteri týraly baiandaldy, dep habarlaidy Aqorda.
Qairat Sháripbaev Prezidentke ótken jylmen salystyrǵanda magistraldi tasymaldaý kórsetkishi 14 paiyzǵa ósip, 65,4 milliard tekshe metrge jetkenin málimdedi. Ulttyq operatordyń tabysy 8 aida 6 paiyzǵa artyp, 1,342 trillion teńge boldy. Taza paidanyń kólemi – 55 paiyzǵa ósip, 304 milliard teńgeni qurady.
Memleket basshysyna biyl otandyq gaz tutynýshylardy 158,8 milliard teńgege sýbsidiialaý sharalary, sondai-aq biýdjetke 128,4 milliard teńge kóleminde salyq jáne basqa da tólemder túskeni jóninde aityldy.
Qairat Sháripbaevtyń málimeti boiynsha kompaniianyń taza tabysy otandyq gaz tasymaldaý júiesin qalypty jaǵdaida ustaýǵa jáne boryshtyq júktemesin azaitýǵa baǵyttalady. «QazTransGaz» AQ kompaniialar toby segiz ai ishinde 995 million dollar kólemindegi kredittik qaryzyn ótegen.
Memleket basshysyna gaz tasymaldaý salasynyń infraqurylymyn jańǵyrtý jáne damytý jobalaryn júzege asyrý, atap aitqanda Mańǵystaý oblysynyń gaz tasymaldaý infraqurylymyn rekonstrýktsiialaý, «Beineý – Bozoi – Shymkent» magistraldi gaz qubyrynyń ekinshi jelisin salý, Qashaǵandaǵy gaz óńdeý zaýyttarynyń qurylysy, sondai-aq «QazTransGaz» aktsionerlik qoǵamyn tsifrlandyrýǵa baǵyttalǵan is-sharalar týraly baiandaldy.
Prezident elimizdi odan ári gazben qamtýǵa qatysty usynylǵan jobalar men is-sharalardy qoldaitynyn aitty.
Kezdesý sońynda Qasym-Jomart Toqaev Qairat Sháripbaevqa elimizdiń gaz salasyn damytýǵa baǵyttalǵan birqatar mindet júktedi.
