Memleket basshysy elordadaǵy innovatsiialyq ekojúie nysandarymen tanysty, dep habarlaidy "Ult aqparat" Aqordanyń baspasóz qyzmetine silteme jasap.
Qasym-Jomart Toqaev «Alem» baǵdarlamalaý mektebine, Halyqaralyq «Astana hub» IT-startaptar tehnoparkine jáne «Astana IT University» aqparattyq tehnologiialar ýniversitetine bardy. Bul nysandardyń bári «Astana EKSPO-2017» aýmaǵynda ornalasqan.
Qazaqstan Prezidenti «Alem» mektebiniń oqytý baǵdarlamasymen tanysty. Oqýshylarmen áńgimelesý barysynda ol álemde IT salasynyń ózektiligi men suranysqa ie ekenin atap ótti.
– Qazaqstannyń maqsaty – álemdik úrdisten qalyp qoimaý. Eń bastysy, zaman aǵymymen júrip otyrýymyz kerek, áitpese biz álemdik damý úderisinen syrt qalamyz. Biz jastardy osyndai daǵdylarǵa baýlyp, atalǵan salaǵa kóptep tartýymyz kerek. Bilim alýǵa umtylatyn óte qabiletti jastarymyz jetkilikti, – dedi Qasym-Jomart Toqaev.
Oqýshylar Memleket basshysyna lektsiialardy, baǵa qoiý ádisin jáne basqa da dástúrli bilim berý elementterin muǵalimsiz baǵdarlamalaýdy qalai úirený kerektigin aitty.
Sodan keiin Memleket basshysy Halyqaralyq «Astana hub» IT-startaptar tehnoparkine bardy. Qasym-Jomart Toqaevqa tehnopark bazasynda júzege asyrylyp jatqan matchmeikingke arnalǵan kibersport platformasy men avtomattandyrylǵan «INUI Software» saýda alańy, «Tastamat» mobildi postamattary, «Clockster» dep atalatyn qyzmetkerlerdiń jumysqa kelip-ketýin tirkeitin biometriialyq júie jáne basqa da startap-jobalar tanystyryldy.
«Astana IT University» aqparattyq tehnologiialar ýniversitetinde Memleket basshysyna joǵary oqý ornynyń negizgi baǵyttary týraly málimet berilip, oqý kabinetteri men zerthanalary kórsetildi.
Qasym-Jomart Toqaev stýdentterdi sapaly bilim alyp, elimizdiń igiligi úshin jumys isteýge shaqyrdy.
– Ýniversitet Elbasy Nursultan Nazarbaevtyń tikelei bastamasymen ashylǵan. Bilim berý turǵysynan bul ýniversitet bedeldi ári bilikti mamandar daiarlaityn, bedeldi oqý ornyna ainalatynyna eshqandai kúmánim joq. Neǵurlym jaqsy bilim alsańyzdar, myna qiyn da almaǵaiyp ómirden alar enshilerińiz soǵurlym kóp bolady, – dedi Prezident.
«Tsifrlandyrý – zaman talaby. «Astana Hub» otandyq innovatsiialyq tsifrlyq ortanyń damýyna mol úles qosýda. «Digital Centre» (tsifrlyq HQKO) kóptegen memlekettik qyzmetterdi elektrondyq túrde kórsetedi. BUU reitingi boiynsha Qazaqstan 26-shy orynda», - dep jazdy keiin Prezident Twitter paraqshasynda.
Sondai-aq, Memleket basshysy Qazaqstan óńirdegi kiber memleketke ainalýy tiis ekenin aitty.
«Astana IT University» jáne «Alem» baǵdarlamalaý mektebinde IT-daryndarynyń jańa býyny qalyptasyp keledi. Olar – ozyq Qazaqstannyń qozǵaýshy kúshi. QR óńirdegi kiber memleketke ainalýy tiis. Elimizdiń tehnologiialyq keleshegi jalyndy jastarymyzdyń qarym-qabiletine bailanysty», - dedi ol.
