Memleket basshysy Qazaqstan halqyn Naýryz merekesimen quttyqtady, dep habarlaidy "Ult aqparat" Aqordanyń baspasóz qyzmetine silteme jasap.
Almaty qalasyna jumys saparymen kelgen Prezident «Astana» alańynda ótip jatqan merekelik sharaǵa arnaiy bardy. Qasym-Jomart Toqaev Qazaqstan halqyn Ulystyń Uly kúnimen quttyqtap, Naýryzdyń ejelden jaqsylyq pen jasampazdyqty dáripteitin mereke ekenin atap ótti.
– Áz Naýryz – bereke-birliktiń, shynaiy janashyrlyqtyń jáne ózara qamqorlyqtyń meiramy. Men búgin Ulys kúnin ózderińizben birge qarsy alý úshin Almaty qalasyna arnaiy keldim. Almaty – Táýelsizdigimizdiń altyn besigi. Halqymyzǵa qaita oralǵan Ulys toiyn merekeleý osy qasterli mekennen bastalǵan. Almaty – Qazaq eliniń rýhani, mádeni jáne iskerlik ortalyǵy, – dedi Memleket basshysy.
Prezident ziialy qaýymnyń jáne óner, bilim, ǵylym, biznes salalary ókilderiniń Almaty shaharynda shoǵyrlanǵanyna toqtalyp, qańtar oqiǵasy kezinde qala turǵyndarynyń zor qaýip-qaterge tótep bergenine erekshe mán berdi.
– Syn saǵatta turǵyndar naǵyz otanshyldyqtyń úlgisin kórsetti. Biz aýyzbirshiliktiń arqasynda memleketimizdi saqtap qaldyq. Men shahardy qalpyna keltirý úshin quzyrly organdarǵa naqty tapsyrmalar berdim. Almatyny órkendetý jáne jergilikti jurttyń turmys sapasyn jaqsartý meniń aiyryqsha nazarymda. Qazir bizdiń aldymyzda zor mindetter men aýqymdy jumystar tur. Ony júzege asyrýǵa almatylyqtar barynsha atsalysady dep senemin, – dedi Qasym-Jomart Toqaev.
Memleket basshysy damýdyń jańa kezeńine qadam basqanymyzǵa toqtalyp, óziniń halyqqa Joldaýynda aitylǵan kólemdi reformalar elimizdi túbegeili jańǵyrtýǵa baǵyttalǵanyn atap ótti.
Prezident búgingi merekelik kúnniń jańa ózgeristerge bastaýyna, tuǵyry myǵym, birligi bekem elimizdiń jasai berýine tilektestik bildirdi. Qasym-Jomart Toqaev quttyqtaý sózinen keiin jinalǵan jurtshylyqpen birge merekelik kontsertti tamashalady.
