Memleket basshysy joǵary deńgeidegi kelissózderden keiin Koreia men Qazaqstannyń iri kompaniialary basshylarynyń jiynyna qatysty, dep habarlaidy "Ult aqparat" Aqordanyń resmi saityna silteme jasap.
Qazaqstan Prezidenti jiynǵa qatysýshylarǵa Prezident Mýn Chje Inmen ótken memleketaralyq kelissózderdiń negizgi qorytyndylary týraly aityp berdi. Qasym-Jomart Toqaev Ońtústik Koreianyń Qazaqstan úshin asa mańyzdy strategiialyq áriptes ekenine toqtaldy.
– Sońǵy 15 jylda Sizdiń elińizden keletin tikelei investitsiia kólemi 6 milliard dollardan asty. Qazaqstanda koreialyq kapital salynǵan 550-den astam kásiporyn tabysty jumys istep jatyr. Olardyń qatarynda Samsung, Hyundai, Lotte, Posco, KNOC jáne basqa da jetekshi korporatsiialar bar. Osy kompaniialardyń qatysýymen jalpy quny 2,5 milliard dollardan asatyn 24 iri joba júzege asyryldy. Ásirese, koreialyq SK Engineering & Construction kompaniiasynyń qatysýymen júzege asyrylyp jatqan Úlken Almaty ainalma tasjolynyń (BAKAD) qurylysyn aitýǵa bolady, – dedi Qasym-Jomart Toqaev.
Sonymen qatar Memleket basshysy avtomobil jasaý, turǵyn úi qurylysy, metallýrgiia jáne aýylsharýashylyǵy siiaqty salalarda jalpy quny 1,5 millard dollardan asatyn keleshegi zor úmit kúttiretin 16 investitsiialyq jobanyń iske asyrylatyny týraly aitty.
Prezident ekonomikalyq yntymaqtastyqty arttyrýǵa jańa múmkindikterdiń bar ekenine nazar aýdardy. Qasym-Jomart Toqaev innovatsiialar men jańa tehnologiialarǵa negizdelgen ekonomikany qalyptastyrýǵa basymdyq beriletinin atap ótti.
– Qaita óńdeý ónerkásibindegi joǵary tehnologiialy óndiris, sondai-aq, Indýstriia 4.0 tehnologiialaryna strategiialyq turǵydan múddelimiz. Ońtústik Koreia ekonomikany tsifrlandyrý boiynsha álemdik kóshbasshy jáne 5G jelileri salasynda úzdik bolyp tanyldy, – dedi Prezident.
Sonymen qatar, Memleket basshysy Qazaqstanda innovatsiialyq tehnologiialardy damytý úshin zamanaýi infraqurylym bar ekenin atap ótti.
– Biz komiýterlik tehnika, jelilik jabdyqtar, derekterdi óńdeý ortalyqtary boiynsha birlesken óndiristik jobalar ashýǵa múddelimiz. Qazaqstan 5G jelisin óristetý baǵytynda jumys istep jatyr. Iri qalalarda alǵashqy synaqtar ótkizildi. Koreia kompaniialaryn elimizde 5G jobalaryn iske asyrý úderisine qatysýǵa shaqyramyn, — dedi Prezident.
Qazaqstan Prezidenti koreialyq áriptesimen áńgime barysynda bizdiń eldegi tabiǵi resýrstarǵa birlesip zertteý júrgizý týraly usynys aitqanyn, keiin tabiǵi bailyqty igerý barysynda korei kompaniialaryna quqyqtyq basymdyq berilýi múmkin ekenin jetkizdi.
Prezident óz sózinde Qazaqstanda balamaly jáne jańaǵyrtylatyn qýat kózderin damytýǵa basymdyq beriletinin atap ótti. Memleket basshysy jel jáne kún energiiasyn paidalanýdyń áleýeti zor ekenin aityp, korei kompaniialaryna osy saladaǵy investitsiialyq múmkindikterdi qarastyrýdy usyndy. Odan bólek, Qasym-Jomart Toqaev forýmǵa qatysýshylardy Qazaqstanda Koreia tehnologiialary boiynsha iadrolyq otyndy birlesip óndirýge, sondai-aq, qaldyqtardy energetikalyq joiý salasyndaǵy jobalardy iske asyrýǵa shaqyrdy.
Qasym-Jomart Toqaev Ońtústik Koreiamen mashina jasaý salasyndaǵy yntymaqtastyqty joǵary baǵalap, bul eldiń iri kompaniialarynyń qatysýymen avtomobil jasaý salasy Qazaqstan ekonomikasynyń qarqyndy damýyna úles qosqanyn atap ótti. Osyǵan bailanysty Prezident avtomobilder jelisin ulǵaitýǵa jáne óndiris oryndaryn arttyrýǵa ázir ekenin málimdedi.
Prezident investorlarǵa arnalǵan institýtsionaldyq ortany qalyptastyrý týraly aita kele, «Kazakh Invest» ulttyq kompaniiasynyń, arnaiy ekonomikalyq jáne indýstrialdyq aimaqtardyń, sondai-aq, «Astana» Halyqaralyq qarjy ortalyǵynyń áleýetin paidalanýǵa shaqyrdy.
Memleket basshysy sózin qorytyndylai kele atalǵan is-shara eki el arasyndaǵy saýda-ekonomikalyq ózara is-qimyldy tereńdetýge jasalǵan naqty qadam ekenin aitty.
Qasym-Jomart Toqaev koreialyq kásipkerlermen naqty jumys isteý úshin Premer-Ministrdiń orynbasary Roman Skliardyń jetekshiligimen arnaiy jumys tobyn qurý týraly sheshim qabyldaǵanyn aitty. Prezident iri investitsiialyq, institýtsionaldyq, inraqurylymdyq jobalardy júzege asyrýdy jáne oǵan jeke monitoring júrgizýdi óz baqylaýyna alatynyn atap ótti.
Dóńgelek ústeldegi áńgimeni KITA Koreia Halyqaralyq saýda assotsiatsiiasynyń tóraǵasy Kristofer Ký júrgizip otyrdy. «Samuryq-Qazyna» UÁQ» AQ tóraǵasy, Koreia Respýblikasynyń saýda, indýstriia jáne energetika ministri, sondai-aq, Samsung Electronincs, Doosan Heavy Industries&Construction, Hyundai Engineering & Construction, Dongil Construction, Lotte Confectionery, BC Card, Seegene Medical Foundation, Korea Health Industry Development Institute (KHIDI), Dongkwang Trading Corporation i Kolon World Investment korei kompaniialarynyń basshylary sóz sóiledi.
Jiynǵa Qazaqstan tarapynan Prezident Ákimshiliginiń basshylyǵy, Úkimet músheleri, «Astana» Halyqaralyq qarjy ortalyǵynyń, «QazTransGaz», Kazakh Invest, «Qazaqtelekom», Kaspi.kz jáne basqa da kompaniialardyń basshylary qatysty.
Dóńgelek ústel qorytyndysy boiynsha jalpy somasy 1,7 milliard AQSh dollary bolatyn 34 kelisimge qol qoiyldy. Onyń 21-i kommertsiialyq jáne 13-i kommertsiialyq emes qujat. Korei tehnologiiasyn tartýǵa basymdyq beretin birlesken investitsiialyq jobalarda, joǵary tiimdiligi men óndiristiń ekologiialyq tazalyǵyna basty mán berilgen.
