Prezident Qasym-Jomart Toqaev Qatar Ámiri sheih Tamim ben Hamad Ál Tánimen kezdesti, dep habarlaidy Aqorda.
Kezdesý barysynda memleketter basshylary Qazaqstan men Qatar arasyndaǵy yntymaqtastyqtyń qazirgi jaǵdaiyn jáne damý perspektivalaryn jan-jaqty talqylady. Kóshbasshylar saýda-ekonomikalyq bailanystardy nyǵaitýǵa jáne birlesken investitsiialyq jobalardy júzege asyrýǵa ózara nietti ekenin rastady. Memleket basshysy ekonomikalyq yntymaqtastyqtyń perspektivalary týraly aita kele, eki el arasyndaǵy ózara saýda-sattyq kórsetkishterin arttyrý mańyzdy ekenine toqtaldy. Prezident eki memlekettiń úkimetteri men isker toptary arasyndaǵy yqpaldastyqty jandandyrýdy usyndy.
«Bizdiń birqatar investitsiialyq jobalarymyz bar. Búgin solardy sizdermen birlesip talqylaýǵa daiynbyz. Qazaqstan kompaniialary osy baǵytta Qatar biznesimen tyǵyz yqpaldastyq ornatýǵa nietti», – dedi Memleket basshysy.
Qasym-Jomart Toqaev Qatar Ámirin ózine yńǵaily ýaqytta Qazaqstanǵa resmi saparmen kelýge shaqyrdy. Óz kezeginde sheih Tamim ben Hamad Ál Táni Dohanyń Qazaqstanmen kópjaqty ekonomikalyq jáne investitsiialyq yntymaqtastyqty damytýǵa múddeli ekenin málimdedi.
«Búgingi ekonomikalyq forýmǵa Qazaqstannyń qatysqany – men úshin úlken mártebe. Bizdiń ózara senimge negizdelgen qarym-qatynasymyz óte jaqsy. Birlesken jobalardy, ásirese, aýyl sharýashylyǵy salasynda júzege asyrýǵa daiynbyz. Bul elimiz úshin basym baǵyt jáne jýyq arada agroónerkásip keshenindegi birlesken jobalardy egjei-tegjeili talqylaý úshin arnaiy top jiberemiz», – dedi Qatar Ámiri.
Áńgime sońynda Tamim ben Hamad Ál Táni Qazaqstanǵa shaqyrǵany úshin Qasym-Jomart Toqaevqa alǵys aityp, jaqyn arada elimizge saparmen kelýge nietti ekenin naqtylady.
