Foto: Aqorda
Mádeniet jáne óner qyzmetkerleriniń kásibi merekesi qarsańynda Aqordada saltanatty jiyn ótti, dep habarlaidy Ult.kz.
Prezident ultymyzdyń bolmys-bitimin saqtaýǵa, halqymyzdyń rýhaniiatyn baiytýǵa zor úles qosyp júrgen sala qyzmetkerlerine rizashylyǵyn bildirdi.
"Mádeniet – ulttyń tólqujaty. Jahan jurty elimizdi, eń aldymen, ónerimiz arqyly tanyp biledi. Biz – Uly dalada tamyr jaiǵan biregei mádeniettiń zańdy muragerimiz. Qazaq jerinen shyqqan qaitalanbas óner ieleriniń teńdessiz týyndylary tutas ultty tárbieledi. Qazir tól mádenietimiz dúnie júzine tanylyp jatyr. Talantty mýzykanttarymyz álemdik sahnalarda tabysty óner kórsetip júr. Qazaq kinogerleri túrli halyqaralyq baiqaýlarǵa qatysyp, sarapshylardyń joǵary baǵasyna ie bolýda. Elordamyzda Dúniejúzilik kóshpendiler oiyndary tabysty ótti. Aqtaý qalasy túrki áleminiń mádeni astanasy bolyp jariialandy. Rýhani muralarymyz tsifrlyq formatqa kóshirile bastady. Taiaýda ultymyzdyń bir jarym myń án-kúii men folklorlyq murasy eń tanymal halyqaralyq platformalarǵa salyndy. Tól ónerimiz kreativti indýstriia arqyly barynsha nasihattalýda", – dedi Prezident.
Qasym-Jomart Toqaevtyń aitýynsha, memleket óner salasyn órkendetýge árdaiym erekshe mán beredi. Óitkeni mádenieti ozyq eldiń rýhy biik bolady.
"Byltyrdyń ózinde 45 jańa mádeniet nysany salyndy. Bul jumys bolashaqta da jalǵasyn tabady. Teatr – rýhaniiatymyzdyń negizgi tireginiń biri. Ulttyq quryltaidyń Býrabaida ótken otyrysynda aimaqtaǵy teatrlardy damytý týraly naqty tapsyrma berildi. Teatrlardyń kópshiligi tolyq jańǵyrtýdy qajet etedi. Keibirine jańa ǵimarat kerek. Osy jumysqa kásipkerler men metsenattardy jumyldyrǵan abzal. Bul – álemde keń taralǵan tájiribe. Mundai jobalarǵa investitsiia salýǵa daiyn azamattar az emes. Men biznes ókilderin rýhaniiatymyzdy damytý isine atsalysýǵa shaqyramyn", – dedi Memleket basshysy.
Prezident elimizde irgeli mádeniet oshaqtary kóp ekenine nazar aýdaryp, olar talai jyldan beri kórermen qaýymǵa taǵylymdy qoiylymdar usynyp kele jatqanyn jetkizdi.
"Osy oraida Biken Rimova atyndaǵy qazaq drama teatryna, Almaty qalasyndaǵy Memlekettik qýyrshaq teatryna jáne Ǵarifolla Qurmanǵaliev atyndaǵy filarmoniiaǵa akademiialyq mártebe berý qajet dep sanaimyn. Bul qadam mádeniet mekemeleriniń jumysyna tyń serpin bereri sózsiz", – dedi Memleket basshysy.
