Foto: Aqordanyń baspasóz qyzmetinen
Memleket basshysy Qasym-Jomart Toqaev Halyqaralyq balalardy qorǵaý kúnimen quttyqtady dep habarlaidy "Ult Aqparat".
Prezident quttyqtaýynyń tolyq mátini:
Qurmetti otandastar!
Barshańyzdy Halyqaralyq balalardy qorǵaý kúnimen quttyqtaimyn! Jarqyn jaz óskeleń urpaqqa qamqorlyqtyń simvolyna ainalǵan osy merekeden bastalady.
Ul-qyzdarymyzdyń parasatty jáne jan-jaqty bolyp ósýine jaǵdai jasaý, jas azamattardyń quqyǵyn qorǵap, densaýlyǵyn saqtaý árdaiym memlekettiń basty basymdyǵy sanalady. Balalar – bizdiń bolashaǵymyz. Sondyqtan elimizdegi árbir jetkinshektiń meiirim men qamqorlyqqa bólenip, úlkenniń qoldaýyn sezinýi, erteńgi kúnge senimmen qaraýy óte mańyzdy.
Men jas urpaq Ádiletti Qazaqstannyń negizgi qaǵidattaryn naqty júzege asyryp, «Adal azamat» tujyrymdamasynyń ozyq idealdaryna tolyq sai bolady dep senemin. Ol úshin biz búkil qoǵam bolyp jalpyulttyq qundylyqtarymyzdy urpaqtyń boiyna sińirýimiz jáne olardy eńbekqorlyq pen bilimpazdyqqa baýlýymyz kerek. Sondai-aq tól tarihymyz ben mádenietimizdi qurmetteýge úiretýimiz qajet.
Barlyq bala ata-anasy men jaqyndaryn oqýdaǵy, shyǵarmashylyq saladaǵy jáne sporttaǵy jetistikterimen, jaqsylyq pen jasampazdyqqa umtylysymen qýanta bersin!
Barshańyzǵa zor densaýlyq, baq-bereke, tolaiym tabys tileimin!
