Foto: Akorda.kz
Qasym-Jomart Toqaev BUU Bas Assambleiasy 78-sessiiasy aiasynda Iran Islam Respýblikasynyń Prezidenti Ibrahim Raisimen kelissóz júrgizdi, dep habarlaidy "Ult aqparat" Aqordanyń baspasóz qyzmetine silteme jasap.
Prezident Qazaqstannyń Kaspii teńizi aimaǵyndaǵy strategiialyq seriktesi retinde Iranmen ekijaqty qarym-qatynastardy nyǵaitýǵa basa mán beretinin aitty.
Kelissóz barysynda eki el basshylary qazaq-iran yntymaqtastyǵynyń qazirgi jai-kúiin jáne ózara qatynastardy odan ári damytý perspektivasyn talqylady. Taraptar kólik, logistika jáne saýda-sattyq salalaryndaǵy yqpaldastyqty arttyrý úshin keshendi sharalar qabyldaý mańyzdy ekenin atap ótti.
– Biz viza rásimine, sondai-aq adamdar men biznestiń ózara qarym-qatynasyna qatysty óte paidaly ýaǵdalastyqtarǵa qol jetkizdik. Qazaqstan tarapy Iranmen aradaǵy yntymaqtastyqty nyǵaitýǵa nietti ekenin atap ótkim keledi. Eki el úkimetteri buǵan deiin Tegeranda qol jetkizgen ýaǵdalastyqtardy júzege asyrý úshin tiisti sharalar qabyldaýy qajet. Men Qazaqstanda Sizben taǵy da kezdesýdi asyǵa kútemin, – dedi Qasym-Jomart Toqaev.
Memleket basshysy eki eldiń Shanhai yntymaqtastyq uiymy jáne basqa da halyqaralyq qurylymdar aiasyndaǵy ózara yqpaldastyǵyn oń baǵalady.
Óz kezeginde Iran Prezidenti Ibrahim Raisi Qazaqstan men Irandy dostyq pen ózara qoldaýǵa negizdelgen úlgili qatynastar bailanystyratynyn atap ótti.
– Iran men Qazaqstan arasynda óte jaqsy ekijaqty qarym-qatynas qalyptasqan. Mundai joǵary deńgeidegi seriktestik bizge ózara bailanystardy, ásirese saýda salasyndaǵy qarym-qatynasymyzdy odan ári damytý úshin naqty qadamdar jasaýǵa jeteleidi. Biz baýyrlas Qazaqstanmen ekijaqty yntymaqtastyqty keńeitýge niettimiz. Elderimizdiń áleýetteri zor jáne osy múmkindikterdi paidalaný bizdiń ortaq igiligimizge qyzmet etedi, – dedi Ibrahim Raisi.
Memleketter basshylary elderimizdiń kólik-tranzit bailanystaryn damytý úshin zor áleýet bar ekenine nazar aýdardy. Atap aitqanda, ózara saýda-sattyqty kúsheitý jáne Kaspii teńizi arqyly júk tasymaldaý úshin «Qazaqstan – Túrikmenstan – Iran» temirjolynyń múmkindigin keńinen paidalaný jaǵdaiy atap ótildi. Qasym-Jomart Toqaev Bender-Abbas portynda Qazaqstannyń saýda terminalyn salýdyń mańyzdy ekenine nazar aýdardy.
Prezidentter belgilengen ekonomikalyq jospardy júzege asyrý úshin úkimetaralyq bailanystardy jandandyrýǵa ýaǵdalasty.
