Eýropalyq taraptyń bastamasymen Qasym-Jomart Toqaev Eýropalyq Keńes Prezidenti Sharl Mishelmen telefon arqyly sóilesti, dep habarlaidy "Ult aqparat" Aqordaǵa silteme jasap.
Prezidentter Aýǵanstandaǵy qazirgi jaǵdai boiynsha jan-jaqty pikir almasty. Qasym-Jomart Toqaev Sharl Misheldiń suraýy boiynsha, Qazaqstannyń aýǵan máselesine qatysty ustanymyn bildirdi. Memleket basshysy álemdik uiymǵa qoldaý kórsetý maqsatymen BUU-nyń Aýǵanstandaǵy keńsesin Almatyda ýaqytsha ornalastyrý týraly sheshim qabyldanǵanyn habarlady.
Qasym-Jomart Toqaev Qazaqstandaǵy aýǵan stýdentterine de tiisti kómek kórsetilip jatqanyn aitty. Memleket basshysy aýǵan máselesine qatysty, sonyń ishinde Aýǵanstanda da Qazaqstan men Eýropalyq Keńes tyǵyz qarym-qatynas ornata alady dep esepteidi. Qazaqstan Eýropalyq Odaq elderiniń azamattaryn evakýatsiialaǵan ushaqtarǵa óz áýejailarynda janar-jaǵar mai quiýǵa múmkindik jasaǵany týraly aityldy.
Taraptar zańsyz migratsiia, esirtki tasymaly, adam jáne qarý-jaraq saýdasynyń aldyn alý boiynsha yntymaqtastyq ornatýǵa múddeli ekenin bildirdi. Qazaqstannyń diplomatiialyq jáne ózge de salalyq vedomstvolary atalǵan máseleler boiynsha Eýropalyq Keńeske konsýltativtik kómek bere alady.
Memleket basshysy Aýǵanstanda barlyq etnostyq toptardyń qatysýymen inkliýzivti úkimet qurylǵannan keiin jaǵdaidyń turaqtalatynyna úmittenedi. Buǵan soǵystan zardap shegip otyrǵan barlyq aýǵan halqy múddeli.
Eýropalyq Keńestiń Prezidenti mazmundy suhbatqa rizashylyǵyn bildirip, aýǵan taqyrybyndaǵy kóp másele boiynsha kózqarastarynyń ortaq ekenin atap ótti. Sharl Mishel Qasym-Jomart Toqaevtyń jyl sońyna deiin bolatyn Briýsselge sapary barysynda jeke kezdesetinine senim bildirdi. Sol saparda Qazaqstan men Eýropalyq Keńestiń yntymaqtastyǵy boiynsha kún tártibindegi aýqymdy máseleler jóninde jan-jaqty pikir almasatynyn aitty.
