Prezident Qasym-Jomart Toqaev Shyǵys Qazaqstan oblysynyń ákimi Danial Ahmetovti qabyldady, dep habarlaidy Aqorda.
Qasym-Jomart Toqaevqa Shyǵys Qazaqstan oblysynyń ekonomikalyq ahýaly jaiynda esep berilip, aimaqtyń qysqa merzimdi jáne keler jylǵa arnalǵan damý jospary, onyń ishinde, ónerkásip ónimderi, aýylsharýashylyǵy, óndiris salalary boiynsha atqarylatyn jumystar jóninde baiandaldy.
Memleket basshysy oblystyń meditsinalyq áleýetin arttyryp, koronavirýs indetiniń ekinshi tolqynyna daiyn bolý kerektigin aitty. Danial Ahmetov óńirdegi juqpaly aýrýlar aýrýhanalaryndaǵy tósek-oryndardyń sanyn 10 esege kóbeigenin, Prezidenttiń tapsyrmasyna sáikes turaqtandyrý qory qurylǵanyn, jalpy quny 18 milliard teńgege meditsinalyq qural-jabdyqtardyń satyp alynyp jatqanyn jetkizdi.
Sonymen qatar oblys basshysy óńirdegi aýylsharýashylyǵy salasynyń qurylymy ózgerip jatqany, «Jumyspen qamtýdyń jol kartasy» baǵdarlamasy sheńberinde atqarylǵan jumystar jaiynda aqparat berdi. Ákimniń aitýynsha, Óskemen – Taldyqorǵan, Semei – Maiqapshaǵai kúre joldary qazan aiynyń sońyna deiin paidalanýǵa beriledi.
Budan bólek Danial Ahmetov Abaidyń 175 jyldyǵy aiasynda jasalǵan jumystardyń nátijesimen tanystyrdy. Biyl Semei qalasyndaǵy avtomobil joldary jóndelip, 300 balaǵa arnalǵan mektep salynǵan. Turǵyn úi qurylysynyń qarqyny artyp, murajai kesheni tolyqtai jańartylǵan.
Kezdesý sońynda Qasym-Jomart Toqaev biylǵy Qazaqstan halqyna arnaǵan Joldaýyndaǵy basym baǵyttardy iske asyrýdyń mańyzdylyǵyna toqtaldy. Aimaqtyń áleýmettik-ekonomikalyq damýyn qamtamasyz etip, oblystyń aýylsharýashylyq salasyndaǵy eksporttyq áleýetin arttyrýdy tapsyrdy.
