Foto: Aqorda
Qazaqstan Prezidentiniń paiymdaýynsha, jahandyq sý diplomatiiasyn damytýda memleketter arasyndaǵy yqpaldastyqtyń mańyzy zor.
"BUU júiesinde tek sý máselesimen ainalysatyn arnaýly qurylym joq. Bul túitkildi tez arada sheshken jón. Qazaqstan Halyqaralyq sý uiymyn qurýdy usynady. Sol arqyly BUU aiasyndaǵy túrli uiymdardyń barlyq mandatyn bir maqsatqa jumyldyrýǵa bolady. UN-Water vedomstvoaralyq tetigin BUU-nyń tolyqqandy arnaýly agenttigine nemese uiymyna ainaldyrý ońtaily sheshim bolar edi. Mundai bastamany iske asyrý BUU-nyń ornyqty damý maqsattary men barsha halyqaralyq qoǵamdastyqtyń múddesine sai keledi. Kelesi jyly sáýir aiynda Astanada Aimaqtyq ekologiialyq sammit ótedi. Atalǵan jiynda Qazaqstan jahandyq sý uiymyn qurý týraly halyqaralyq konsýltatsiia protsesin bastaýǵa nietti. Ortaq saiasi erik-jigerdiń arqasynda kún tártibindegi sýdyń ózekti máseleleri júieli túrde sheshile bastaitynyna senimim kámil", – dedi Memleket basshysy.
Qasym-Jomart Toqaev transshekaralyq sýdy paidalaný, Aral jáne Kaspii teńizderinde qalyptasqan ekologiialyq problemalarǵa nazar aýdardy. Prezident sý qaýipsizdigin qamtamasyz etýge erekshe mán berý qajet dep sanaidy.
"Sý tapshylyǵy úlken problemaǵa ainalyp keledi. Bul resýrsty saqtaý ári uqypty paidalaný – elimiz ben aimaqtaǵy ózge de memleketter úshin strategiialyq, tipti ómirlik mańyzy bar basymdyq. Ózge elderde de solai dep oilaimyn. Transshekaralyq sýdy paidalaný problemasyn, Aral jáne Kaspii teńizderinde qalyptasqan ekologiialyq ahýaldy ýaqyt ozdyrmai sheshý maqsatynda tiisti sharalar qabyldaý qajet. Bizdiń pikirimizshe, ózara mámilege negizdelgen birlesken áreketter arqyly Halyqaralyq Araldy qutqarý qorynyń tiimdiligin arttyrýǵa bolady. Resei Qor jumysyna baiqaýshy retinde atsalyssa, bul iske septigin tigizer edi. Kaspii teńizi qazirgidei tartyla berse, bul qaýipti qubylystyń ekologiialyq, áleýmettik-ekonomikalyq, tipti saiasi saldary aýyr bolýy múmkin. Qazaqstan Kaspii ekojúiesiniń buzylýy men teńizdiń tartylýynyń aldyn alýǵa baǵyttalǵan arnaiy memleketaralyq baǵdarlama ázirleý týraly bastama kóterdi. Barsha álemdik qoǵamdastyqty osy biregei sý aidynyn saqtap qalý jolyndaǵy kúsh-jigerimizdi qoldaýǵa shaqyramyz", – dedi Qasym-Jomart Toqaev.
Qazaqstan Prezidenti sózin qorytyndylai kele, Ashhabad forýmy múddeli memleketterdiń jasampaz seriktestigin nyǵaitýǵa jáne álemde ádiletti tártip qalyptastyrýdy kózdeitin halyqaralyq kúsh-jigerge tyń serpin beretinine senim bildirdi.
