Memleket basshysy Qasym-Jomart Toqaev Belarýs Respýblikasynyń Prezidenti Aleksandr Lýkashenkomen shaǵyn quramda kelissózder júrgizdi, dep habarlaidy "Ult aqparat" Aqordaǵa silteme jasap.
Kelissózder barysynda Qasym-Jomart Toqaev Aleksandr Lýkashenkonyń elimizge resmi sapary Qazaqstan men Belarýs arasyndaǵy ózara strategiialyq áriptestik pen ekonomikalyq is-qimyldardyń damýyna sony serpin beretinin atap ótti.
– Aleksandr Grigorevich, Sizdiń saparyńyz - biz úshin asa mańyzdy. Óitkeni bul bizdiń memleketterimiz arasyndaǵy yntymaqtastyq pen qarym-qatynastardyń shynaiy dostyq sipatqa qurylǵanyn dáleldeidi. Sonymen qatar eki eldiń iskerlik áriptestigine, onyń ishinde, ekonomikalyq, gýmanitarlyq bailanystar men halyqaralyq qarym-qatynastarǵa tyń serpin beredi, – dedi Qazaqstan Prezidenti.
Memleket basshysy Belarýs Respýblikasy táýelsizdiginiń negizin qalaǵan kórnekti memleket qairatkeri Aleksandr Lýkashenkoǵa Qazaqstanda shynaiy qurmetpen qaraitynyn atap ótti.
Aleksandr Lýkashenko Qasym-Jomart Toqaevqa qonaqjailyq kórsetkeni úshin rizashylyǵyn bildirip, eki el arasynda qalyptasqan tarihi dostyq bailanystarǵa nazar aýdardy.
– Qazaqstanmen aradaǵy qarym-qatynasymyz óte jaqsy ekenin, ekonomikamyzdyń birin-biri tolyqtyryp otyratynyn jáne eki el ózara jańa múmkindikterge jol ashatynyn aitqym keledi. Bizdiń elimizde shyǵarylatyn ónimder Qazaqstanǵa qajet. Al biz qazaqstandyq ónimderdi satyp alýǵa daiynbyz, – dedi Belarýs Prezidenti.
