Foto: Akorda.kz
Memleket basshysy Bala quqyqtary jónindegi ýákil Arýjan Saindi qabyldady, dep habarlaidy "Ult aqparat" Aqordanyń resmi saityna silteme jasap.
Kezdesý barysynda balalardyń densaýlyǵy men áleýmettik turǵyda qorǵalýyna, sondai-aq balalarǵa jasalatyn zorlyq-zombylyqqa qarsy is-áreketke qatysty ózekti máseleler talqylandy.
Memleket basshysyna Bala quqyqtary jónindegi ýákildiń atqarǵan qyzmeti týraly esep berildi.
Prezident kámeletke tolmaǵan balalardyń qaýipsizdigin qamtamasyz etý jáne quqyq buzýshylyqtardyń aldyn alý úshin pármendi sharalar qabyldaý, sondai-aq jetim balalardyń quqyqtaryn qorǵaýǵa berilgen kepildikti saqtaý, múmkindigi shekteýli balalardy qoldaý mańyzdy ekenine nazar aýdardy.
Qasym-Jomart Toqaev bala quqyǵyn qorǵaý jáne densaýlyǵyn saqtaý júiesin nyǵaitý asa mańyzdy ekenin atap ótti. Sondyqtan balalardy qorǵaýǵa qatysty barlyq usynys pen bastamany júzege asyrmas buryn muqiiat zertteý qajet.
Sonymen qatar Memleket basshysy týyndaǵan túitkilderdi sheshýge tikelei atsalysý úshin Bala quqyqtary jónindegi ýákildiń jergilikti jerdegi jumysyn jandandyrý qajet ekenine nazar aýdardy.
Budan bólek, Prezident Bala quqyqtary jónindegi ýákilge birqatar mindet júktedi. Atap aitqanda, balalardyń qaýipsizdigin qamtamasyz etý jónindegi sharalardy kúsheitý, balalarǵa qatygezdik jasaý faktilerine der kezinde mán berý, býllingke qarsy kúresý, balalar men jasóspirimder arasyndaǵy sýitsidke itermeleitin áreketterdiń aldyn alý, arnaiy bilim alýǵa muqtaj balalardy qoldaý, sondai-aq jetim-balalar men ata-anasynyń qamqorlyǵynsyz qalǵan balalardy baspanamen qamtamasyz etý máselelerine basa nazar aýdarýdy tapsyrdy.
