Nursultan Nazarbaev grek-rim kúresi jattyqtyrýshysy Vadim Psarevtiń otbasyna kóńil aitý jedelhatyn joldady, dep habarlaidy Aqordanyń baspasóz qyzmeti.
Memleket basshysy grek-rim kúresiniń áigili jattyqtyrýshysy Vadim Aleksandrovich Psarevtiń qaitys bolýyna bailanysty kóńil aitty.
«Vadim Aleksandrovich sport salasynda jarty ǵasyrdan astam ýaqyt qyzmet etken kezinde Valerii Rezantsev, Jaqsylyq Úshkempirov, Anatolii Nazarenko jáne Vladimir Bakýlin siiaqty Olimpiada oiyndarynyń jeńimpazdary men júldegerleriniń dańqty shoǵyryn tárbielep shyǵardy. 2014 jyly álemdik grek-rim kúresin damytýǵa eleýli úles qosqany úshin FILA-nyń Dańq zalyna onyń esimi jazyldy», - delingen jedelhatta.
Sońynda Qazaqstan Prezidenti Nursultan Nazarbaev Vadim Psarevtiń jarqyn beinesi halqymyzdyń jadynda árdaiym saqtalatynyn atap ótti.
