Memleket basshysy AQSh-tyń saiasi jáne sarapshy top ókilderimen kezdesý ótkizdi, dep habarlaidy "Ult aqparat" Aqordaǵa silteme jasap.
Qazaqstan Prezidenti Qasym-Jomart Toqaevtyń Niý-Iorkke sapary AQSh-taǵy yqpaldy taldaý ortalyǵy sanalatyn «Atlantic Council» («Atlantikalyq keńes») uiymynyń qoldaýymen uiymdastyrylǵan belgili amerikalyq saiasatkerlermen jáne sarapshylar qaýymdastyǵynyń ókilderimen kezdesýmen bastaldy.
Kezdesý barysynda Memleket basshysy Qazaqstan-Amerika qarym-qatynastarynyń qazirgi jai-kúii men damý perspektivalary, syrtqy saiasattyń negizgi basymdyqtary, Qazaqstannyń saýda-ekonomikalyq jáne investitsiialyq áleýeti týraly egjei-tegjeili baiandady.
Qasym-Jomart Toqaev AQSh-pen yntymaqtastyqty arttyrý Qazaqstan úshin asa mańyzdy ekenin atap ótti.
– Biz Tuńǵysh Prezident Nursultan Nazarbaevtyń 2018 jyldyń qańtar aiynda AQSh-qa jasaǵan resmi sapary barysynda qol jetkizgen kelisimderiniń júzege asyrylýyna erekshe mán beremiz. Bul sapar eki el arasyndaǵy keń aýqymdy strategiialyq áriptestiktiń negizin qalady, – dep atap ótti Qazaqstan Prezidenti.
Memleket basshysy AQSh-tyń Qazaqstan ekonomikasynyń iri investorlarynyń biri ekenin eske saldy. Búginde amerikalyq investitsiianyń jalpy kólemi 45 mlrd dollardan asqan.
Sondai-aq, Qasym-Jomart Toqaev amerikalyq áriptesterge energetikalyq saladaǵy birqatar birlesken jobalardyń tabysty júzege asqany týraly habardar etti. Sonymen qatar, aýyl sharýashylyǵy jáne joǵary tehnologiia salalary boiynsha ózara is-qimyldy arttyrý úshin jańa múmkindikterdiń bar ekenine nazar aýdardy.
Prezidenttiń aitýynsha, Qazaqstan aldaǵy ýaqytta da amerikalyq biznes ókilderimen uzaq merzimdi ekonomikalyq bailanystardy nyǵaitýǵa nietti.
Óz kezeginde amerikalyq áriptester ekijaqty yntymaqtastyq deńgeiin joǵary baǵalap, Qazaqstanmen ózara tiimdi strategiialyq yntymaqtastyqty odan ári nyǵaitýdyń áleýeti zor ekenin atap ótti.
***
1961 jyly qurylǵan «Atlantikalyq keńes» AQSh-tyń jetekshi saraptamalyq jáne ǵylymi ortalyqtarynyń biri sanalady. Keńes transatlantikalyq bailanystar, integratsiialyq protsester, qaýipsizdik jáne qorshaǵan orta máselelerin zertteýmen ainalysady.
