Qazaqstan Prezidenti «Samuryq Qazyna» aktsionerlik qoǵamy basqarmasynyń tóraǵasy Ahmetjan Esimovti qabyldady, dep habarlaidy "Ult aqparat" Aqordaǵa silteme jasap.
Kezdesý barysynda Memleket basshysyna «Samuryq Qazyna» aktsionerlik qoǵamynyń biylǵy 7 ai ishindegi qyzmetiniń nátijeleri men aldaǵy kezeńdegi josparlary jóninde málimet berildi.
– Birinshi jartyjyldyqtyń negizgi kórsetkishteri jaqsy. Ózińiz bekitken Qor strategiiasyn júzege asyrý maqsatymen belgili bir jumystar atqarylyp, birqatar nátijelerge qol jetkizildi. Sonyń ishinde, holdingti transformatsiialaý isi jalǵasýda, jekeshelendirý aiasynda 42 milliard teńge kólemindegi 18 aktiv iske asyryldy. Osy jyldyń aiaǵyna deiin «Qazaqtelekom», «Air Astana» jáne «Qazatomónerkásip» kompaniialaryn IPO-ǵa shyǵarýdy josparlap otyrmyz, – dedi Ahmetjan Esimov.
Nursultan Nazarbaev Qordyń satyp alý kólemin básekelestik ortaǵa berýdiń mańyzdylyǵyna toqtalyp, atqarylǵan jumystardyń shaǵyn jáne orta biznesti qoldaý isindegi oń nátijelerin atap ótti.
Sońynda Memleket basshysy «Samuryq Qazyna» aktsionerlik qoǵamy qyzmetiniń tiimdiligin arttyrý jóninde birqatar tapsyrma berdi.
