Foto: Aqorda
Qasym-Jomart Toqaev mártebeli meimanǵa iltipat bildirip, onyń bul sapary Qazaqstan men Birikken Arab Ámirlikteri arasyndaǵy yntymaqtastyqqa tyń serpin beretinine nazar aýdardy, dep habarlaidy Ult.kz.
Prezidenttiń aitýynsha, Ámirlikter – elimizdiń eń basty seriktesteriniń biri. Qos memlekettiń maqsat-múddeleri bir-birimen sáikes keledi. 2023 jyly eki el úkimetteri Strategiialyq investitsiialyq jobalardy júzege asyrý týraly birlesken deklaratsiiaǵa qol qoidy.
Kezdesýde Birikken Arab Ámirlikteriniń Qazaqstan ekonomikasyndaǵy eń iri sheteldik investorlardyń ondyǵyna kiretini jóninde aityldy. Byltyr BAÁ-nyń elimizge quiǵan investitsiia kólemi eki esege artyp, rekordtyq kórsetkishke jetti.
Memleket basshysy atalǵan sapar aiasynda quny 5 milliard dollardy quraityn 20-dan astam kommertsiialyq kelisimge qol qoiylatynyn quptady. Olardy júzege asyrý elder arasyndaǵy strategiialyq yntymaqtastyqty aitarlyqtai ilgeriletip, ózara tiimdi bailanystardy nyǵaitýǵa septigin tigizedi.
Abý Dabidiń Taq murageri kórsetilgen qonaqjailyq úshin rizashylyǵyn bildirdi. Sonymen qatar tabiǵaty kórkem, halqy jaisań elimizge erekshe qýanyshpen keletinin jetkizdi.
Haled ben Muhammed Ál Nahaian Qazaqstan men BAÁ arasyndaǵy qarym-qatynas ózara senim, qoldaý jáne ortaq igilikke birge umtylý qaǵidattaryna qurylǵanyn atap ótti. Bul bailanystar saýda-investitsiialyq yqpaldastyq sheńberinen shyǵyp, energetika, kólik salalarynan bastap tsifrlyq infraqurylym men bilim berý isine deiin jalǵasyp jatqan keń aýqymdy baǵyttardy qamtitynyna toqtaldy.
Taq murageriniń aitýynsha, búgin qol qoiylatyn kelisimder eki eldiń bolashaqta da birlesip jumys isteýge beiil ekenin dáleldeidi.
