Memlekettik qyzmette basshy laýazymdaǵy áielderdiń úlesi 40 paiyzdy quraidy. Bul týraly QR Memlekettik qyzmet isteri agenttigi Memlekettik qyzmet departamenti direktorynyń orynbasary Dýman Ábilov aitty, dep habarlaidy QazAqparat.
Onyń aitýynsha, elimizde memlekettik qyzmette basqarýshy laýazymdarda 9,5 myńnan astam áiel eńbek etedi. Bul basshylardyń jalpy sanynyń 40 paiyzyn quraidy.
«Bul rette ministrlerdiń orynbasarlarynyń – 14,3, óńir ákimderi orynbasarlarynyń – 7,1, ortalyq memlekettik organdar komitetteri tóraǵalarynyń orynbasarlary men departament direktorlarynyń – 29,2, ortalyq memlekettik organdardyń aýmaqtyń bólimsheleri basshylarynyń 12,8, oblystyq basqarma basshylarynyń - 15,3, qala jáne aýdan ákimderi orynbasarlarynyń 15,1 paiyzy áielder», - dedi Dýman Ábilov.
Spikerdiń aitýynsha, agenttik konkýrstyq rásimderdiń ashyqtyǵyn qamtamasyz etý úshin júieli jáne josparly jumys júrgizip otyr. Bul memlekettik qyzmetke ornalasýǵa teń múmkindik jasaýdyń mańyzdy sharty sanalady. Memlekettik organdarda áńgimelesý barysy tehnikalyq jazba quraldarynyń kómegimen tirkeledi. Sonymen qatar kandidattar da jazý qurylǵylaryn paidalana alady.
Kandidattardan konkýrstyq komissiianyń sheshimine shaǵym túsken jaǵdaida zańnamanyń saqtalýy turǵysynan tekserý taǵaiyndalady. 2019 jyly júrgizilgen konkýrstarǵa 52 144 adam qatysqan. Bul rette memlekettik qyzmetke úmitkerlerdiń 24 028-in áielder qurady. Konkýrs nátijesinde taǵaiyndalǵan áielderdiń úlesi 46,2 paiyz boldy.
