QR Memlekettik qyzmet isteri jáne sybailas jemqorlyqqa qarsy is-qimyl agenttiginiń tóraǵasy Alik Shpekbaev biýdjet shyǵyndaryn qysqartý arqyly jalaqyny kóterý máselesine toqtaldy, dep xabarlaidy QazAqparat tilshisi.
«Prezidenttiń naqty tapsyrmasy bar. Memlekettik qyzmetshilerdiń jalaqysyn kóterý kerek. Biz atalǵan mindetti oryndaýǵa mindettimiz. Kelesi jyldan bastap enshiles kásiporyndardy ońtailandyramyz ba, qysqartamyz ba, biraq osy máseleni sheshýimiz kerek. Árine, keibir memlekettik organdarda qysqartýlar bolady. Qalai bolsa da, biz ákimshilik shyǵyndardy qysqartý máselesin jiti baqylaýymyz qajet», - dedi A.Shpekbaev «Astana - adaldyq alańy» jobasy aiasynda ótken jiynda.
Onyń aitýynsha, búginde kez kelgen kásiporynnyń uiymdastyrýshylyq-quqyqtyq formasyn aýystyryp, biýdjettiń biraz qarajatyn únemdeýge bolady. Ol aqshaǵa jalaqyny da kóterýge múmkindik bar. Eń bastysy, myqty ári kásibi basshylar bolýy qajet.
«Máselen, Astandaǵy balalar úiin alaiyq. Biz onyń uiymdastyrýshylyq-quqyqtyq formasyn ózgerttik. Buryn kommýnaldyq memlekettik mekeme bolsa, qazir kommertsiialyq emes aktsionerlik qoǵam bolyp qaita quryldy. Sonyń nátijesinde myqty menedjerler keldi. Naǵyz patriottar eken. Qyzmetkerlerdiń jalaqysy kóterildi. Buǵan deiin minimaldy jalaqy 33 myń teńge boldy. Búginde 120 myńǵa deiin kóterildi. Al basshylardyń jalaqysy 120 myń teńgeden 450 myń teńgege deiin ósti. Osynyń ózi biýdjetti durys basqarý arqyly biraz nárseni ózgertýge bolatynyn kórsetip otyr. Ondai tájiribeni keńinen taratýymyz qajet», - dep atap kórsetti A.Shpekbaev.
Aita keteiik, búgingi jiynda Astana ákimi Áset Isekeshev biýdjettik sala qyzmetkerlerine 1 million teńge kólemindegi turǵyn úi kýálikteriniń beriletinin málimdedi.
«Qazirgi kezde biz qala qyzmetkerlerine arnalǵan jańa turǵyn úi baǵdarlamasyn ázirlep jatyrmyz. Ony Turǵyn úi qurylys jinaq banki arqyly iske asyratyn oiymyz bar. Turǵyn úi kýálikteri arqyly biz muǵalimder, dárigerler jáne taǵy basqa mamandardyń baspana máselesin sheshýdi kózdeimiz», - dep atap kórsetti Á.Isekeshev.
Al QR Bilim jáne ǵylym ministri Erlan Saǵadiev oqýshylardyń barlyq baǵalaryn onlain rejimde baqylap otyrǵanyn jetkizdi.
Aldaǵy ýaqytta balabaqshalar arasynda oryndy ózara kelisip aýystyrýǵa tyiym salynbaqshy.
