Memlekettik qyzmetterdi kórsetýde engizilgen jańalyqtardy halyq arasynda keńinen túsindirý kerek. Bul týraly Parlament Májilisiniń tóraǵasy Nurlan Nyǵmatýlin palatanyń jalpy otyrysynda málim etti, dep habarlaidy QazAqparat tilshisi.
Atap aitqanda, búgin palata depýtattary «Qazaqstan Respýblikasynyń keibir zańnamalyq aktilerine memlekettik qyzmetter kórsetý máseleleri boiynsha ózgerister men tolyqtyrýlar engizý týraly» zań jobasyn birinshi oqylymda maquldady.
«Búgin barshamamyz talqylaǵan zań jobasy halqymyz úshin óte mańyzdy ári óte qajetti. Sebebi Qazaqstandaǵy árbir azamattyń qajettilikteri memlekettik qyzmet kórsetý baǵytynda retteledi. Sondyqtan memqyzmetti kórsetý árqashan da zaman talabyna sai jańaryp otyrýy kerek. Munymen qosa, osy saladaǵy jumystar qoljetimdi ári sapasy joǵary deńgeide bolýy tiis», - dep toqtalda Májilis tóraǵasy.
Osy oraida N. Nyǵmatýlin Elbasy Nursultan Nazarbaev 2020 jyly 90 paiyzǵa deiin elektrondy formatta memqyzmetterdi kórsetý maqsatyn qoiǵanyn eske saldy.
Atap aitqanda, depýtattar Qazaqstan Respýblikasynyń qoldanystaǵy zańnamasyna jáne zań tehnikasynyń talaptaryna sáikes keltirý boiynsha, sondai-aq zań jobasynyń jekelegen normalaryn naqtylaityn jáne mazmunyn jaqsartatyn túzetýler engizdi. Jumys tobyna depýtattar men komitetterden 578 usynys kelip túsip, múddeli ministrlikter, vedomstvolar jáne qoǵamdyq uiymdar ókilderiniń qatysýymen jumys tobynyń bes otyrysynda, Komitettiń keńeitilgen otyrysynda talqylandy. Osynyń nátijesinde, memqyzmetterdi alý úshin jinalatyn qujattar kólemi eleýli túrde qysqarady dep kútilýde.
«Túzetýler qashyqtyqtan turǵyndarǵa barlyq qajetti memlekettik qyzmetterdi alýǵa múmkindik beredi. Búginde keibir qyzmetterdi qashyqtyqtan alýǵa bolady. Alaida kóp jaǵdaida bizdiń azamattar Halyqqa qyzmet kórsetý ortalyǵyna baryp, kezekke turyp jatady. Negizi, bul qyzmetti olar úiden shyqpastan alýyna jaǵdai jasalǵan», - dedi Májilis tóraǵasy.
Osy oraida ol halyq arasynda aýqymdy túsindirý jumystaryn júrgizý kerektigin atap ótti.
