«Tabiǵat» ekologiialyq qaýymdastyqtar men kásiporyndar odaǵynyń tóraǵasy Mels Eleýsizov tabiǵat janashyry retindegi jumysyn jandandyrýǵa nietti, dep habarlaidy QazAqparat.
«Bul ispen ainalysqanyma 35 jyl boldy. Partiia problemalardy Parlament tórinde aitý úshin qajet. Al Parlament kópshiliktiń basymdyǵy qaǵidaty boiynsha jumys isteidi. Qazir partiia quratyn sát kelip tur. Maǵan Prezidenttiń kóppartiialyq týraly aityp júrgeni unaidy. Biraq partiiany áýeli qurý kerek. Bul iste eń mańyzdy másele – adamdardyń qyzyǵýshylyǵy. Qazir saiasat týraly aitýshylar kóp. Men ekologiialyq partiia qurý týraly usynys kóterdim. Biraq ol úshin kóp adam qajet. Qazir eldiń ishinde bul máselede túsinistik bar. Ekologiiaǵa qatysy joq sala nemese adam bolmaidy. Bárimizdiń qatysymyz bar. Qazaqstan úshin bul - erekshe másele. Ekologiia – ómirdiń negizi. Ekologiialyq partiia qurý jumysyn qaita jandandyrýdy usynamyn. Bul partiia ekologiia problemalarymen ǵana ainalyspaýy kerek. Óitkeni adam júrgen jerde ekologiia máselesi qosa júredi», - dedi ekolog.
Onyń paiymynsha, partiia qurý – memleketke qajet sharýa.
«Saiasi baǵyt durys tańdalsa jetistik te bolady. Barsha jurtty ekologiia máselesimen saiasi deńgeide ainalysýǵa shaqyramyn. Halyqtyń ekologiialyq sanasy jetilgen bolýy kerek. Bul – bolashaqtyń qamy. Biz quratyn partiiany halyqtyń qoldaǵany kerek», - deidi Mels Eleýsizov.
Sondai-aq, ol kún tártibinde turǵan ózekti ekologiialyq problemalar tóńireginde oi qozǵady.
«Aǵashty aiaýsyz kesý tyiylar emes. Almatyda jaidan-jai talai aǵash otaldy. Bul Almatynyń ómirine qaýipti. Ekologiia máselesi tym aýqymdy. Sondyqtan eshkim eshteńeni sheshe almai otyr. Kez kelgen máseleni ekologiia turǵysynan qaraýǵa bolady. Iaǵni, sheshim qabyldaǵan kezde ekologiialyq turǵydan kelsek, nátije bolady. Qazir klimattyń jylynýy beleń alyp tur. Tabiǵi resýrstar sarqylyp jatyr. Tipti óte az qaldy. Ekologiia ministrliginiń geologiialyq barlaýǵa mán berýi tegin emes. Qazir shara qoldanbasaq, qapy qalamyz. Qazirdiń ózinde territoriiamyzdyń 4% sýǵa ainalyp ketti. Muzdyqtardyń 44% erip joǵaldy. Bulai kete berse, sýsyz qalamyz. Bul iske saýatty kelý kerek», - deidi tabiǵat janashyry.
Qazir búkil eldiń aýzynda júrgen Sorbulaqtyń máselesimen ol 35 jyldan beri alysyp kele jatqanyn aitty.
«Meniń buǵan deiin aitqandarymnyń bári shynǵa ainalyp otyr. Qazir ahýal qiyn. Sorbulaq búlinse, Balqash aýdany, Ile aýdanynyń jartysy qaýip astynda qalady. Bári bul máseleni jyly jaýyp qoiǵysy keledi. Biraq problemadan qashqanmen qutylmaisyń. «Tabiǵat – saliqaly uiym. Biz problemany kórsetip qanai qoimai, sheshý jolyn usynamyz. Sorbulaq máselesi boiynsha bizden basqa eshkim naqty sheshim usynǵan da joq», - deidi «Tabiǵat» ekologiialyq qaýymdastyqtar men kásiporyndar odaǵynyń tóraǵasy.
