Sýret: Freepik.com
Májilis spikeri Erlan Qoshanov hidjabqa qatysty daýǵa pikir bildirdi, dep habarlaidy Sputnik Qazaqstan.
"Biz - zaiyrly memleketpiz. Bul máseleniń barlyǵy Konstitýtsiiamyzda, zańymyzda kórsetilgen. Sonymen qatar bizdiń Konstitýtsiiamyzda din bostandyǵy bar. Óziniń dini rásimin jasaimyn degenderge eshqandai shekteý joq. Meshit bolsyn, shirkeý bolsyn, kez kelgen dini ortalyqtarǵa bara alady", - dedi Qoshanov Májilis kýlýarynda.
Onyń pikirinshe, mektepti dini aǵymdardyń ordasyna ainaldyrmaý kerek.
"Ol – bilim ordasy, bilim berý kerek. Sondyqtan balalardy, oqytýshylardy basqa máselege alańdatpaýymyz kerek dep oilaimyn. Onyń ústine ministrlik bekitken mektep formasyna qatysty standarttar bar. Sol standarttardy ustanýymyz kerek", - dedi spiker.
Eske sala keteiik, buǵan deiin Oqý-aǵartý ministri Ǵani Beisembaev mektepte hidjab kiiýge ruqsat berýdi talap etken azamattarǵa jaýap bergen bolatyn.
"2016 jyly bekitilgen oqýshylardyń formasy men kiimine qatysty buiryq bar. Ol ózgergen joq. Sondyqtan balalar mektepke oqýshy formasymen kelýi kerek. Bul balalardyń birdei bilim alýy úshin jasalyp otyr. Sondyqtan bul baǵytta ózgeris joq, bári zań aiasynda", - dep málimdedi Beisembaev.
Qazaqstan musylmandary dini basqarmasy qoǵamda týyndaǵan máselege óz málimdemesin jariialady.
"Múftiiat shariǵat boiynsha baliǵat jasyna tolǵan musylman qyzǵa oramal taǵý paryz ekenin joqqa shyǵarǵan emes. Sondai-aq oramal taǵý - ulttyq dástúrimiz. Muny musylman qaýymy tereń túsinýi tiis. Alaida shariǵatymyz baliǵat jasyna tolmaǵan qyzǵa oramal taǵýdy mindettemeidi. Muny da musylman jamaǵaty durys túsinýi kerek", - delingen habarlamada.
QMDB bul máselege qatysty ýákiletti memlekettik mekemelerge tiisti usynystar bergen.
"Musylman jamaǵatynyń ótinishi eskerilip, oń sheshim qabyldanady dep úmittenemiz", - dep túiindedi múftiiat ókilderi.
