QR Ishki ister ministri Erlan Turǵymbaev Qazaqstan mektepteriniń qaýipsizdigin tekserý nátijelerin aityp berdi, dep habarlaidy QazAqparat.
«Tatarstandaǵy qaiǵyly oqiǵaǵa bailanysty Memleket basshysynyń tapsyrmasymen mektepter qaita tekserildi. Nátijesinde birqatar kemshilikter tabyldy: mektepter 100% beinebaqylaý kameralarymen qamtamasyz etilgen. Biraq onyń jartysy (45,5%) standartqa sai kelmeidi. Jumys istemeitin, toqqa qosylmaǵan jáne barlyq aýmaqty qamtymaǵan kameralar bar. Mundai kemshilikter Qaraǵandy oblysynda kóp tirkelgen. 505 mekteptiń 84% tiisti beinekamera ornatylmaǵan. Túrkistan oblysyndaǵy 889 mekteptiń 70% beinekameralar tehnikalyq parametrge sai emes», - dedi E. Turǵymbaev Úkimet otyrysynda.
Ministrdiń aitýynsha, beinekameralar mektepke kiretin jáne shyǵatyn esikte, ár qabatta jáne aýlada turýy kerek. Odan bólek kameralardyń barlyǵy Jedel basqarý ortalyǵyna qosylmaǵan. Respýblika boiynsha bul ortalyqqa tek 1085 mektep qosylǵan. Mundai problemalar Shymkent qalasy, Almaty, Jambyl jáne Batys Qazaqstan oblystarynda bar.
«Mektepterdiń 30 paiyzynda ǵana dybystyq jáne signaldyq habarlaý júiesi bar. Bul júieler Almaty, Pavlodar jáne Batys Qazaqstan oblystarynda joq. Sonymen qatar dabyl knopkalaryn barlyq mektepterge engizý qajet. Bul balalardy qaýipsiz jerge kóshirip, dabyl berý úshin qajet. Biraq bundai dabyl knopkalary mektepterdiń tek 9% bar. Jáne olar kúzet uiymdaryna qosylýy tiis. Al kirýdi baqylaý jáne basqarý pýlti mektepterdiń 5%, týrniketter – 4% bar. Bul júiege qosylǵan mektepterde elektrondy kartalar arqyly balalardyń kirip-shyqqanyn baqylaýǵa bolady. Sonymen qatar, ata-analaryna SMS jiberiledi. Qazir Nur-Sultan jáne Almaty qalalarynda osyndai mektepter bar», - dedi ministr.
