Bilim berý uiymdaryn attestatsiialaý kezinde birinshi kezekte qaýipsizdik deńgeii esepke alynatyn boldy, dep habarlaidy "Ult aqparat".
Bilim jáne ǵylym ministri Ashat Aimaǵambetov Úkimet janyndaǵy kámeletke tolmaǵandardyń isteri jáne olardyń quqyqtaryn qorǵaý jónindegi vedomstvoaralyq komissiianyń otyrysynda sońǵy kezde álemde mektepterge shabýyldar jiilep ketkenine toqtaldy.
«Eger oqýshy nemese shartty túrde mektep túlegi óz mektebine qarýmen baratyn bolsa, bul tek bilimge ǵana emes, sonymen qatar tárbie jumysyna, jalpy áleýmettený máselelerine, býllingke, balalardyń mekteptegi ahýalyna nazar aýdarý qajet ekenin bildiredi. Al bala mektepte ózin baqytty sezinse, ol oǵan erteń qarý ustap kirmeidi» - dedi Ashat Aimaǵambetov.
Ol, sondai-aq, bilim berý uiymdaryn attestatsiialaý tártibine osy turǵydan ózgertýler enetinin eskertti.
«Barlyq bilim berý uiymdaryn akkreditteý jáne attestattatsiialaý standarttaryna qaýipsizdik máselelerin birinshi kezekke engizdik. Iaǵni, endi mektepti attestattatsiialaý nemese akkreditteý kezinde birinshi kezekte balalardyń bilimin emes, uiym qyzmetkerleri men tálim alýshylardyń túrli jaǵdailarda ózin qalai ustaiytynyna, balalardyń qaýipsizdigi qanshalyqty saqtalǵanyna basa mán beriledi» - dep túsindirdi ministr.
