Qazaqstan mektepterinde mamandandyrylǵan kúzet mindetti túrde bolady. Bul týraly QR IIM Ákimshilik politsiia komitetiniń tóraǵasy Murat Baimuqashev málim etti, dep habarlaidy QazAqparat.
«Búginde bilim berý uiymdarynyń basym bóligi terroristik turǵyda álsiz nysandar sanatyna jatqyzylǵan. Mamyr aiynyń basynda Úkimet qaýlysymen mundai nysandardy antiterroristik qorǵaýdyń jańa talaptary bekitildi. Eger buǵan deiin mundai talaptar usynys sipatynda bolsa, endi bilim berý nysandary baqylaý júiesimen, qyzmetkerler men kelýshilerdi habarlandyrý quraldarymen, «dabyl» túimeshegimen, mamandandyrylǵan kúzetpen, ótkizý júielerimen mindetti túrde jabdyqtalýy tiis», - dedi komitet tóraǵasy Ishki ister ministrliginde ótken baspasóz máslihaty barysynda.
Onyń atap ótýinshe, elimizdiń Bilim jáne ǵylym ministrligi tiisti nusqaýlyq ázirlep jatyr.
«Sonymen qatar ol terroristik qaýip týyndaǵan jaǵdaida pedagogtar men oqýshylardyń is-áreketiniń jan-jaqty tártibin qamtidy», - dedi Murat Baimuqashev.
