2020-2021 oqý jylyna daiyndyq aiasynda mektepter ata-analar jinalysyn ótkizdi, dep habarlaidy QR Bilim jáne ǵylym ministrligi.
Mektep ákimshiligi men synyp jetekshileri ata-analarǵa oqý jylynyń balasy oqityn mektepte qalai bastalatynyn egjei-tegjeili túsindirip, suraqtarǵa jaýap berdi.
«Onlain jiyn barysynda synyp jetekshiler oqýshylarynyń ata-analaryna qazirgi epidemiologiialyq jaǵdaida mekteptiń qandai oqytý formatyn tańdaǵanyn túsindirdi. Jańa oqý jyly qashyqtan bilim berý formatynda bastalady. Ata-analardyń tilekteri men ótinishteri boiynsha bastaýysh synyp oqýshylary mektepke baryp oqi alady. Bul rette bilim alýshylar men pedagogterdiń dene qyzýy kún saiyn ólshenetin bolady. Kezekshi synypta sozylmaly aýrýlary joq balalar ǵana bilim ala alady (ótinishte kórsetiledi).
Bir synypta oqýshy sany 15-ten aspaityn bolady. Ótinishterdi synyp jetekshileri qoljetimdi bailanys quraldary arqyly qabyldaidy. «Kezekshi synypqa» qabyldaý 25 tamyzda bastalady», delingen habarlamada.
Budan bólek, sanitarlyq-epidemiologiialyq jaǵdaiy qolaily aýyldyq eldi mekenderde oqý protsesi sanitarlyq qaýipsizdik sharalaryn saqtai otyryp, dástúrli formatta júrgiziletin bolady.
«Ata-analar balalardy mektepke alyp kelip, úiine ózi alyp ketýi kerek. Kezekshi synyptarda sabaqtyń uzaqtyǵy 40 minýt. Sabaq arasyndaǵy úziliste ár synypqa ár túrli ýaqytta beriledi. Árbir ekinshi sabaqtan keiin kabinetterde jáne ár úzilisten keiin, aýysymdar arasynda, dálizderde, holdarda ylǵaldy tazartý jumysy júrgiziledi. Mektep ashanasy men býfettiń qyzmeti ýaqytsha toqtatyldy. Bilim berý uiymdary zalalsyzdandyrýǵa arnalǵan quraldarmen, aiaq kiimdi zararsyzdandyrýǵa arnalǵan kilemshelermen, sanitaizerlarmen qamtamasyz etiledi», delingen habarlamada.
Mektep formasyna qoiylatyn talaptar joiylmaidy, biraq tiisti buiryqqa ýaqytsha ózgertildi. Iaǵni ata-ana jańa oqý jylynda (1 qyrkúiekten bastap 25 mamyrǵa deiin) balasyn mektepke mektep formasymen nemese basqa yńǵaily kiimmen jiberýge qatysty sheshimdi ózi qabyldaidy.
Shaǵyn jinaqty mektepterde oqityn oqýshylardyń ata-analaryna da sanitarlyq sharalardy saqtaý qajettiligi týraly aityldy.
Sondai-aq búgin balalary qashyqtan oqityn ata-analar úshin bilim berý platformalarynyń múmkindikteri kórsetildi. Aita keteiik, Bilim jáne ǵylym ministrligi qandai da bir bilim berý internet platformasyn tańdaýǵa qatysty sheshim qabyldamaidy. Árbir mektep qashyqtan oqytýdy uiymdastyrýǵa negiz bolatyn internet platformany ózi tańdaidy.
Ótken oqý jylynyń tórtinshi toqsanyndaǵydai, dúisenbiden jumaǵa deiin «Balapan» jáne «El-Arna» respýblikalyq telearnalarynda qosymsha bilim berý resýrsy retinde paidalaný úshin telesabaqtar kórsetiledi.
Sonymen qatar karantindik jáne shekteý sharalary jaǵdaiynda 1-11(12) synyptarda oqý jetistikterin baǵalaý júiesine qatysty ýaqytsha ózgerister engizildi. Jańa oqý jylynda toqsan saiyn bólim úshin 1 jiyntyq jumys jáne toqsan úshin 1 jiyntyq jumys júrgiziledi. Toqsandyq baǵalaý kúndelikti baǵalaý, BJB jáne TJB kórsetkishteri negizinde shyǵarylatyn bolady.
