Mektepter men balabaqshalarda ornatylǵan beinebaqylaý júiesiniń 11,4%-y ǵana politsiianyń jedel basqarý ortalyǵyna qosylǵan, dep habarlaidy "Ult aqparat".
Úkimet otyrysynda balalardyń qaýipsizdigin qamtamasyz etý máseleleri týraly baiandama jasaǵan Bilim jáne ǵylym ministri Ashat Aimaǵambetov osyndai derekter keltirdi.
«Búginde mektepter men balabaqshalar 100% beinebaqylaý júiesimen jabdyqtalǵan. Biraq onyń 21%-y bekitilgen talaptarǵa sáikes kelmeidi. Biz jýyqta ǵana aýqymdy tekserý jurgizgen bolatynbyz. Sol kezde osy másele belgili boldy. Tek qana 823 mektep nemese 11,4%-ynyń beinebaqylaý júiesi politsiia organdarynyń jedel basqarý ortalyǵyna qosylǵan», - dedi ministr.
Vedomstvo basshysy arnaiy kúzetpen qamtylǵan mektepterdiń sany 466 ǵana ekenin aitady.
Bul - eldegi orta bilim nysandarynyń 6,4%-y ǵana degen sóz.
«Barlyq mekteptiń 14,9%-ynda ǵana dabyl túimesi bar. Búkil mektepterdi jaqyn arada osyndai qurylǵymen qamtý qajet», - dedi Bilim jáne ǵylym ministri.
