Foto: belta.by
Densaýlyq saqtaý ministrligi QR Premer-Ministriniń tapsyrmasy boiynsha Oqý-aǵartý ministrligimen, Qazaq taǵamtaný akademiiasymen, IýNISEF jáne DDU-men birlesip 2025 jylǵy 1 qyrkúiekten bastap kúshine enetin mekteptegi tamaqtanýdyń jańa standarty men kóp nusqaly úlgilik mázirdi ázirlep, bekitti.
Jańa standartqa sáikes mázirden shujyq ónimderi, ystalǵan et, qant qosylǵan shyryndar alynyp tastaldy, dep habarlaidy Densaýlyq saqtaý ministrligi.
"Mázir balalardyń fiziologiialyq qajettilikteri men kaloriiasyn eskere otyryp jasalǵan, onda jas sanattary, maýsymdyq, sondai-aq as blogy joq mektepterdegi balalardyń tamaqtanýy eskerilgen. Standart sondai-aq shaǵyn jinaqtalǵan mektepterde, býfetterde tamaqtanýdy uiymdastyrýǵa jáne qant diabeti, tamaq allergiiasy, tseliakiia aýrýy, laktoza jetkiliksizdigi jáne basqa da aýrýlar siiaqty erekshe dietalyq qajettilikteri bar balalardy tamaqtandyrýǵa qoiylatyn talaptardy qamtidy", – dedi QR DSM Sanitariialyq-epidemiologiialyq baqylaý komiteti tóraǵasynyń orynbasary Roza Qojapova búgin Mańǵystaý oblysynda ótken keńeste sóilegen sózinde.
Qujat mektepke deiingi, orta, tehnikalyq jáne kásiptik, sondai-aq bilim berý-saýyqtyrý uiymdarynda tamaqtanýdy uiymdastyrýdyń biryńǵai tásilderin qalyptastyrýǵa baǵyttalǵan.
Jańa standartqa sáikes dietada qant, tuz jáne mai mólsheri edáýir azaiady, quramynda tabiǵi emes ónimder men tuz ben qant kóp bolatyn ónimder (shujyq ónimderi, ystalǵan et, qant qosylǵan shyryndar, spredter, dám men iisti kúsheitkishi bar ónimder jáne t.b.) alynyp tastalady, jańa pisken kókónisterdiń, jemisterdiń jáne tabiǵi ónimderdiń úlesi artady.
As blogy joq shaǵyn jinaqtalǵan mektepterde ystyq býterbrodtan, ashytylǵan sút óniminen (iogýrt), maýsymdyq jemisterden jáne sýsynnan (sút, airan, itmuryn sýsyny, keptirilgen jemister, jidekterden) turatyn lanch-paketter daiyndalady.
Qazirgi ýaqytta mektep ákimshilikterin, meditsina qyzmetkerlerin, tamaqtaný qyzmetterin jetkizýshilerdi jáne brakerajdyq komissiianyń múshelerin onlain oqytý júrgizilýde. Keiinnen mektepke deiingi balalar uiymdarynyń qyzmetkerlerin oqytý josparlanǵan.
Ázirlengen mázir Sanepidbaqylaý komitetiniń resmi saitynda ornalastyryldy jáne bilim basqarmalary men biznes sýbektilerin habardar etý úshin Oqý-aǵartý ministrligine jiberildi.
