Foto: massaget.kz
Elimizdiń oqýshylary Cońǵy qońyraý merekesin 1 maýsym kúni atap ótedi. Bul týraly Oqý-aǵartý ministrligi Orta bilim komitetiniń tóraǵasy Gúlmira Kárimova aitty, dep habarlaidy "Ult aqparat" ministrliktiń baspasóz qyzmetine silteme jasap.
"Barlyq qazaqstandyq mektepte oqý jylynyń uzaqtyǵy - 36 apta. Dástúr boiynsha, oqý jylynyń birinshi kúni - 1 qyrkúiek, al biyldan bastap sońǵy oqý kúni - 31 mamyr. Bul kúni oqýshylardyń jas ereksheligine sáikes, sabaqtarmen qatar, sabaqtan tys sharalar ótkiziledi. 1 maýsym - jazǵy kanikýldyń alǵashqy kúni, sonymen birge bul kúni balalardy qorǵaý kúnimen qatar, mektepterde sońǵy qońyraý merekesi ótkiziledi", - deidi ol videoda.
Aita keteiik, keshe Májilistiń jalpy otyrysynda depýtat Amanjol Áltai mektepterdegi sońǵy qońyraý kúnin 30 mamyrǵa nemese 1 maýsymǵa aýystyrýdy suraǵan edi.
«Elimizde 31 mamyr asharshylyq jáne saiasi qýǵyn-súrgin qurbandaryn eske alý kúni bolyp belgilendi. Bul kúni alash arystarynyń rýhyna jasap júrgen qurmetimiz olardyń eskertkishteri men memorialdyq oryndarǵa gúl shoǵyn qoiýdan aspai tur. QR Oqý-aǵartý ministriniń 2022 jylǵy 12 tamyzdaǵy № 363 buiryǵyna sáikes, orta bilim beretin mektepterdegi sońǵy qońyraý 31 mamyr bolyp bekitilip otyr. Alash arystarynyń amanatyn urpaq sanasyna sińirýge tiis ministrliktiń 31 mamyr kúniniń mańyzyna mán bermegeni qandai ókinishti?! Arystarymyzdyń rýhyna bir kúndi de tolyq qimai, apyl-ǵupyl aza tutqansyp, ile-shala toi toilap, dýmandatyp kete beretin bolsaq, eldigimiz qaisy?! Sondyqtan mektepterdegi sońǵy qońyraý kúnin 30 mamyrǵa, ne bolmasa 1 maýsymǵa aýystyrý kerek. Bul – eshqandai talqylaýdy qajet etpeitin ádiletti talap», - dedi Amanjol Áltai Úkimet basshysynyń orynbasary Altai Kólginovtyń atyna joldaǵan saýalynda.
