QR Bilim jáne ǵylym vitse-ministri Rústem Biǵari muǵalimderdi Ustazdar kúnimen quttyqtap, Qazaqstanda qazirgi ýaqytta 500 myńǵa tarta ustaz baryn málim etti, dep habarlaidy QazAqparat.
«Qazirgi tańda Qazaqstanda 500 myńǵa tarta muǵalim men pedagog bar. Elimizde búgingi tańda muǵalimge shynynda da, óte jaýapty missiia júktelip otyr. Balalarǵa tereń bilim berip qana qoimai, balanyń boiynda azamattyq minez qalyptastyrý – mine, ustazdar osyndai jaýapty paryzdy arqalaǵan. Sózsiz, memleket osy mamandyqtyń mártebesi men abyroiyn arttyrý úshin qanshama shara qabyldap jatyr. 2016 jyldan beri bizde ústemaqy jolǵa qoiyldy. Biliktiligin arttyrǵan ustazdarǵa da aqshalai qoldaý bar», - dedi ol Ustazdar kúnine arnalǵan «Prezident Qasym-Jomart Toqaevtyń Qazaqstan halqyna Joldaýy: muǵalimniń áleýmettik rólin arttyrý aspekti» taqyrybynda ótken dóńgelek ústelde.
Vitse-ministrdiń aitýynsha, muǵalimderdi jigerlendirý úshin elimizde «Qazaqstannyń eńbek sińirgen ustazy» ataǵy beriledi.
«Kelesi jyldan bastap magistrlik bilimi bar ustazdarǵa 10 AEK kóleminde qosymsha aqy qosatyn jańa norma kúshine enedi. Ókinishke qarai, qazirgi ýaqytta magistrlerdiń sany tym az (mektepte eńbek etetin) – bar-joǵy 5 myń ǵana. Meniń oiymsha, muǵalimder mektepte sheberligimen birge biliktilik deńgeiin de arttyryp, ǵylym salasynda eńbek etýi kerek», - dedi ol.
Eske sala ketsek, osydan biraz ýaqyt buryn Úkimet otyrysynda «Pedagog mártebesi týraly» zań jobasy bekitilgen bolatyn. Qazirgi ýaqytta zań jobasy Parlament Májilisiniń qaraýynda jatyr.
Buǵan deiin Parlament Májilisinde «Pedagog mártebesi týraly» zań jobasyn tanystyrý barysynda QR Bilim jáne ǵylym ministri Ashat Aimaǵambetov magistr dárejesi bar muǵalimderge qansha aqsha tólenetinin aitqan edi.
