QR Qoǵamdyq damý vitse-ministri Berik Aryn mektepke hidjab kigen qyzdardyń ata-anasyna aiyppul salynyp jatqanyn aitty, dep habarlaidy Baq.kz tilshisi.
Senat otyrysynda joǵarǵy palata depýtaty Nariman Tóreǵaliev qazir keibir oblystarda mektep formasyn kimeitin oqýshylar kezdesetinin aitty. Senator bundai balalardyń sany toqtamai turǵanyna alańdaýshylyq bildirdi.
«Búgingi kúni qansha bala forma kimei, mektepke bara almai otyr? Sonyń sany bar ma? Bul máseleni qalai sheship jatyrsyzdar? Balabaqshalarda osyndai jaǵdailar kezdesti me?», - dep surady Nariman Tóreǵaliev.
«Byltyr jyl bitken kezde, osy jyldyń basynda respýblika boiynsha 2,5 myńǵa jýyq qyz mektepke hidjab kiip kelgen. Túsindirý jumystarynyń nátijesinde búgingi kúni olardyń sany 815-ke azaidy. Jalpy, jyldan jylǵa bul máseleni sheship jatyrmyz. Bunyń bir joly «Bilim týraly» zańda jazylǵan. Onda «ata-analar balalaryn mektepke aparýǵa jáne mekteptiń formasyn saqtaýǵa mindetti. Ony istemese, jaýapkershilikke tartylady» delingen. Bilim ministriniń buiryǵy bar. Ol jerde mektep formasy týraly jazylǵan. Keiingi kezde taǵy da bir daý týyp, bizge kóp syn aitylatyn boldy. Mysaly, keibireýler bizge «mini iýbka, jabysqan kiimderge qaramaisyńdar, nege myna (hidjab – avt.eskertýi) jaǵyna ǵana qaraisyńdar» deidi. Biz bul týraly da óz usynystarymyzdy Bilim ministrligine jiberdik. Olar ózderiniń buiryǵyna ózgerister engizip jatyr. Bul jerde memlekettikń tuǵyry anyq: Mektep dinnen alshaq bolýy kerek. Osy tuǵyrdy ustanýymyz kerek», - dedi Berik Aryn Senat otyrysynda.
Vitse-ministr byltyr búkil balabaqshada tekserý júrgizilgenin de aitty. Olardyń arasynan dini baǵyttaǵy balabaqshalar anyqtalǵan. Olar Almaty qalasy men basqa birneshe qalada tirkelgen. Bul balabaqshalardyń báriniń jumysy jergilikti atqarýshy organdardyń kúshimen toqtatylǵan.
«Bundai monitoring udaiy júrgizilip turady. Osylaisha, tek qana ózderiniń dini sektalary, toptarynyń balalary baratyn balabaqshalar, oryndar, faktiler kezdesken», - dep tolyqtyrdy B.Aryn.
Vitse-ministr Senat kýlýarynda bergen suhbatynda Qoǵamdyq damý ministrligi BǴM-ǵa mini iýbkamen qatar, dekolte, baǵaly áshekeiler taǵýǵa tyiym salý týraly usynystar jasaǵanyn aitty. Qazir BǴM osy boiynsha jumys istep jatyr eken. Sondai-aq, ol qazir hidjabpen júrgen qalǵan 815 qyzben túsindirý jumystary júrgizilip jatqanyn aitty.
«Jalpy, kórsetkish birtindep azaiyp jatyr. Oqý jyly bastalǵaly bir ai bolmai jatyp, adamdar túsindi, kóbi adasyp júrgenin bildi, keibiri buny áli durys dep qabyldaidy. Osy boiynsha jumys ári qarai júrgiziledi. Qazir de sharalar qabyldanyp, aiyppul salynyp jatyr. Keshe bizdiń mýfti sóz sóilep, «kámelet jasqa tolmaǵan balalardy oramal taqqyzyp, májbúrleýge bolmaidy. Bul dinge qarama-qaishy, bundai islam shariǵatynda joq» dedi. Hidjab kigen qyzdar kóptegen óńirde, negizinen Qazaqstannyń ońtústigi men batysynda kezdesedi», - dedi Berik Aryn.
Atap ótsek, búgin Parlament Senaty Áleýmettik - mádeni damý jáne ǵylym komitetiniń keńeitilgen otyrysy ótti. Jiynda «QR keibir zańnamalyq aktilerine dini qyzmet jáne dini birlestikter máseleleri boiynsha ózgerister men tolyqtyrýlar engizý týraly» QR zań jobasy qaraldy.
