sýret ashyq derekkózden alyndy
Premer-Ministrdiń orynbasary Altai Kólginov bilim berý uiymdarynda qaýipsizdikti qamtamasyz etý máselesi boiynsha keńes ótkizdi. Oǵan ministrlerdiń jáne oblystardyń, Astana, Almaty, Shymkent qalalary ákimderiniń orynbasarlary qatysty, dep habarlaidy "Ult aqparat" primeminister.kz saityna silteme jasap.
QR oqý-aǵartý birinshi vitse-ministri Sholpan Karinova bilim berý uiymdarynda qaýipsizdikti qamtamasyz etý jónindegi jaǵdai týraly, 2022 jyly bilim berý nysandaryn terrorizmge qarsy qorǵaý nusqaýlyǵy týraly, bilim berý uiymdarynda paidalaný úshin shektelgen tyiym salynǵan zattardyń tizimin bekitý jóninde baiandady.
"Mysaly Almaty, Qostanai, Túrkistan oblystarynda, Ulytaý, Jetisý, Abai oblystarynda beinebaqylaý júiesi joq. Soltústik Qazaqstan, Qostanai, Túrkistan oblystarynyń iri qalalarynda mamandandyrylǵan kúzet qyzmetimen kelisimshart jasalmaǵan. Barlyq oqý oryndary qaýipsizdiktiń keshendi júiesimen qamtamasyz etilýi tekseriledi.
Sondai-aq Oqý-aǵartý ministrligi balalardy zorlyq-zombylyqtan qorǵaý, sýitsidtiń aldyn alý jáne balalardyń quqyqtaryn qamtamasyz etý, onyń ishinde Qaýipsizdik júiesin uiymdastyrý jónindegi keshendi jospardyń jobasyn ázirlep jatyr. Oǵan 20-ǵa jýyq memlekettik organ men óńirler jumyldyrylǵan. Negizgi másele - qaýipsizdik salasyndaǵy qyzmetterdi satyp alý úshin jergilikti ákimdikterden qarjylandyrýdyń azdyǵy" - delingen aqparatta.
Ishki ister ministriniń orynbasary Igor Lepeha bilim berý uiymdarynda qaýipsizdikti qamtamasyz etý jónindegi ishki ister organdarynyń jumysy jáne laýazymdy tulǵalardyń kúzet qyzmeti men jaýapkershiligine qoiylatyn talaptardy kúsheitý jónindegi sharalar týraly málimet usyndy.
"Ol Petropavl qalasyndaǵy №4 orta mektepte bolǵan oqiǵaǵa qatysty tekserý barysynda nysanda týrniket pen mamandandyrylǵan kúzettiń joqtyǵy anyqtalǵanyn atap ótti. 15 mekteppen beinebaqylaý júielerin jedel basqarý ortalyqtaryna qosý týraly sharttar jasalǵan. Onyń ishinde №4 OM sharty 31.12.2022 jyly aiaqtalǵany anyqtaldy. Qarajat bólingenimen, mektepter kelisimsharttar jasamaǵan. Qazirgi ýaqytta laýazymdy tulǵalardyń jaýapkershiligi qarastyrylyp jatyr" - delingen habarlamada.
Foto: primeminister.kz
Al vitse-premer Altai Kólginov oqýshylardyń qaýipsizdigin qamtamasyz etý máselesiniń ózektiligin atap ótti.
«Bilim berý uiymdarynda tehnikalyq jaraqtandyrý jáne litsenziialanǵan kúzet máseleleri boiynsha jergilikti atqarýshy organdardyń jumysynda aitarlyqtai kemshilikter men olqylyqtar bar. Munyń barlyǵyn kelesi oqý jylynyń basyna deiin túzetý qajet. Bilim berý uiymdarynda qaýipsizdikti qamtamasyz etý boiynsha sharalar qabyldanbaǵan jaǵdaida qatań jaýapkershilikke tartatyn bolamyz», — dedi Altai Kólginov.
Keńes qorytyndysynda jaýapty memlekettik organdarǵa oqý jyly bastalǵanǵa deiin bilim berý uiymdaryn dabyl túimelerimen, týrnikettermen, litsenziialanǵan kúzetpen jaraqtandyrý jáne ishki ister organdarynyń jedel basqarý ortalyqtaryna qosylǵan beinebaqylaý júielerin ornatý jumystaryn aiaqtaý tapsyryldy. QR Oqý-aǵartý ministrligi Balalardy qorǵaý jónindegi keshendi jospardyń jobasyna psihologiialyq qyzmetterdiń, olardyń kadrlyq quramynyń jáne t. b. qyzmetin kúsheitý máselelerin engizýi kerek. QR IIM QR TJM-men birlesip bilim berý uiymdarynda qaýipsizdik talaptaryn saqtaý boiynsha monitoring júrgizýge tiis.
