Prezident kadr rezervi men «Bolashaq» baǵdarlamasynyń qatysýshylaryna bilim berý uiymynyń direktoryn tańdaýda basymdyq berilmek. Bul týraly QR BǴM mektepke deiingi jáne orta bilim komitetiniń pedagogikalyq kadrlar men kórsetilgen memlekettik qyzmetti monitoringteý jumystary jónindegi basqarma basshysy Aiman Dúisembaeva málim etti, dep habarlaidy QazAqparat.
«Qazirgi tańda «Pedagog mártebesi týraly» zań aiasynda birqatar normativti-quqyqtyq qujattardy qabyldap jatyrmyz. Sonyń biri – bilim berý uiymdarynyń basshylaryn taǵaiyndaý erejesi. Bul jerde mektepke deiingiden bastap tolyǵymen tehnikalyq-kásiptik bilim berý júiesine deiingi bilim berý uiymdarynyń basshylaryn taǵaiyndaý erejesi jasalyp jatyr. Qazirgi tańda bul ereje memlekettik jáne jergilikti atqarýshy organdarmen kelisilýde. Jergilikti atqarýshy organnyń barlyǵynan kelisim aldyq», - dedi Aiman Dúisembaeva Bilim jáne ǵylym ministrliginiń elordada ótip jatqan jinalysynda.
Basqarma basshysynyń aitýynsha, burynǵy tártip boiynsha tek talaptar qoiylyp, direktorlar taǵaiyndalyp kelgen. Al qazir mektepke deiingi uiymdar úshin - bir bólek, arnaiy mamandandyrylǵan mektepter úshin - bir bólek, tehnikalyq jáne kásiptik bilim uiymdarynda - bir bólek talaptar bekitilgeli otyr. Iaǵni, ár uiymnyń ózindik talaptary bar.
«Biraq bárine qatysty bir talap bar - úmitker 72 saǵattyq menedjment kýrsynan mindetti túrde ótýi tiis. Sonymen qatar onyń birinshi, joǵary nemese jańa deńgeidegi sarapshy, zertteýshi jáne sheber sanattarynyń bolýy mindetti. Bul úrdis tórt kezeńmen ótkiziledi. «Bolashaq» baǵdarlamasy jáne Prezident kadr rezervinen kelgen úmitkerlerdi birden tórtinshi kezeńge jiberýdi qarastyryp otyrmyz. Odan bólek keiingi kezde qamqorshylyq keńesten ótpegen jaǵdaida biz úmitkerdi oblystyq bilim basqarmasyna usynamyz», - dedi ol.
Basqarma basshysy bilim uiymdaryna basshylyq etý úshin direktor ótýi tiis tórt kezeńdi atap berdi.
«Birinshisi – úmitkerdiń qujattaryn qaraý, ekinshi kezeń – qamqorshylyq keńesine jiberý, úshinshisi – oblystyq bilim basqarmasynan kelisim alý, tórtinshi kezeń – jergilikti jerdegi konkýrstyq komissiiaǵa barý. Sonymen qatar pedagogika jáne psihologiia boiynsha test jalpy 120 suraqtan turady. Sonyń árbir baǵytynan mindetti túrde 50 paiyzdyq upai jinaý kerek. Sonda ǵana konkýrsqa jiberiledi», - dedi ol.
